|
3rd August, 2012
SANDAKAN: Kiikila 200 tuhun mogiigizon id Kampung Ponubukan Tangkarason, id Paitan, mokianu do kopolintaan Pogun Sabah do poposikap proses kopolijistohan ningkokoton kampung dioho.
Minoboos i hahansanon do mogiigizon, i Jamiues Ingkis do pokionuon o ningkokoton kampung dino montok papavasa dioho kounonom koumatan impoon om sakadai di pinotounda do polinta.
Notinpuunan minongukab o kampung diho miampai tapanazan pomutanaman gata di toun 1995 i sinusuut dinadi iso kokampungan. Baino diti kivaa no 40 hamin i kogumuan do mogiigizon pakalaja sabaagi mobuubuvat.
“Miampai aiso ningkokoton sabaagi iso kampung, au kaanu zikoi momiumon koumatan om sakadai di potoundaon do kopolintaan montok popobuu kinoizonon diti.
“Miaga do talun alun kitinaviu tohu kilometer id kampung diti noumbak om aanu noopo avazaan do kulita apat tayol mingkakai (4WD). Au nakaanu iho kopoingkavasan ningkokoton,” ka disido kuminaa doid Bernama.
Minoboos isido do nakapaatod isido suat upalai lijistol kuminaa id Upis Uvang Beluran di tohu toun nakatahib nga gisom baino, aiso nuununu husi notoimo.
Minoboos i Jamiues do asansagan nogi izioho humansan kumaa vaig asam om toobong montok koonuan vaig tohidang, naamot do panaakan lotilik nopo nga aanu mantad vinakas i miho noopo gunoon sohinaid tohu jaam, iho nopo nga mantad jaam ko-6.00 minsosodop giosm jaam ko-9.00 totuvong do tikid tadau.
Ka disido, minonoodo nogi izioho panambazangan miampai tohuod do mogiigizon sondii.
|
