|
3rd August, 2012
BEAUFORT: Layat id Sabah mositi tuutulus poposondiu kahansanan kumaa polinta Barisan Nasional (BN) i pointahang kaanu mongumohig nasip layat om okon ko id noonombo misosonguhun, ka di Kumoduvo Ponikoon Tinan Pitubungan Umno pogun, Datuk Seri Salleh Said Keruak.
Minoboos isido buuan mikot om mamanau nga ikoton parti mositi potihombuson.
“Au tokou kaanu poposondiu timpu dumonto dotokou kumaa noonombo minsosonguhun. Timpu dumonto dotokou posoviton dotokou kumaa parti di pointahang kaanu mongumohig dotokou ino nopo nga Umno om BN.
“Misosonguhun nopo au songkuo kiguno… onu i kiguno nopo nga parti. Kakal zou po kosoou ontok di tobpinai tondu ku totuo miningkakat id tikit Parti Keadilan Rakyat (PKR) huminavan di mokikipihi BN (Datuk Jainab Ahmad) id Karambunai di poguhui. Intangan ku kozo isido do aaha om naaha isido. Okon ko kokomoi paganakan, okon ko kokomoi tambahut nga iti kokomoi ikoton,” ka disido.
Minoboos isido dino id iso lamai makan sungkai om solat Tarawih miampai layat om buuan Barisan Nasional (BN) Sabah id natadon hamin Montili Kotundaan Mogiigizon om Ahal Momoguno Sabah, Datuk Azizah Mohd Dun id Kg. Limbawang, somok doiti.
Isido i nogi Speaker Dewan Koundangan Pogun Sabah minoboos pulitik nopo nga montok kovosian mogiigiozn om pogun nga okon ko ikoton dino montok misosonguhun.
“Pulitik okon ko montok sondii. Pulitik dino montok popobuu mogiigizon. Au tokou apatut mokinongou (totondos) boogizan havan (parti gugumaga) tu dandi dioho dino nopo nga dandi toomis no,” ka disido.
Bagas Vozoon Montili dino nga pinoposoou mooi puu Umno tomoimo miiso montok mongintong kahantazan om timpu dumonto tinau om pogun tuutulus ajamin.
“Insan tadau di poguhui, minogitotongkizad tokou. Touvi no dino pinopiiso dotokou, buuan om mogiigizon.
“Mositi miiso tokou. Nung mogitotongkizad tokou okon ko ouhan montok dotokou miiso mahik. Balang di tavasi diti mositi gompizon montok timpu dumonto dotokou,” ka disido miampai do minoboos do kotuhidan id suang ikoton kiguno kozo montok mongintong Umno om BN tuutulus kapantod id Sabah.
Kopiondot dino, magangat i Salleh layat pogun diti mooi do manaak sokodung togiot potihombus kumaa BN ontok pomihian mikot montok timpu dumonto pogun di tanavau.
|
