|
|
|
Yahya pinopotunui do suat kasagaan koonuan sakadai tangki kuminaa songuhun mantad mononoimo.
|
3rd August, 2012
KOTA KINABALU: Kumoduvo Vozoon Montili Sabah Datuk Seri Yahya Hussin kikangazan hahansanon layat mantad Sabah apatut timbangon montok monuang kalaja Kumoduvo Montili Pomuhominan om Kopolintaan Kinoizonon montok sumovohi Datuk Seri Lajim Ukin.
Sundung i do ingkaa, minoboos isido tumanud kumaa Huguan Montili Datuk Seri Najib Tun Razak montok papatantu dino.
“Nung pataakon kumaa (hahansanon layat) Sabah hobi vinasi,” ka disido kuminaa magaganu abal id lamai pomogizan Tangki 1Malaysia Uvang Putatan id Dewan Togumu Guno Putatan, id doiti, di koniab.
Ontok Tadau Koduvo nakatahib, Yang di-Pertuan Agong Tuanku Abdul Halim Mu’adzam Shah pinopoimagon pinopotingkod kopomihian di Lajim sabaagi Kumoduvo Montili Pomuhominan om Kopolintaan Kinoizonon.
Ontok Tadau Koonom nakatahib, Datuk Seri Lajim Ukin pinopoboos kahapasan kalaja sabaagi puu Kounsol Takavas Umno, Huguan Umno Boogizan Beaufort om Ponikoon Barisan Nasional (BN) Beaufort tuminimpuun tuutulus. Sundung i do ingkaa isido kakal po sabaagi puu Umno.
Yahya i nogi Montili Pomutanaman om Pomounan Taakanon pogun au minonulak dati ‘aiso kopokionuan toi ko kogunaan’ montok kalaja kumoduvo montili dino suangan saasabap no do pomihian tagazo papanaon do soosongian nopo timpu.
Id suang pason disido id lamai dino, minoboos isido sakadai tangki 1Malaysia dino montok mongintong do mogiigizon kampung di au songkuo tangakgazan kivaa kaganapan vaig kouha sundung tu uvang Putatan au nokotoguvang kobohingkangan sandad dino.
“Polinta Barisan Nasional (BN) kivaa mogisusuvai lahan om pongkimamaan montok monuhung layat id pogun diti, potitikid tadau podompoton tokou sakadai kumaa dioho i kipotutan om montok di au po nokotoimo sakadai mositi kotoboi, kada dodizon ino ahal di tagazo,” ka disido.
Tumanud disido, kiginumu do 263 mantad 696 tangki 1Malaysia kikoumpasan 400 gelen miampai kagaganapan dino pinatazad kumaa mogiigizon kampung id uvang Putatan i sinakadai poimponu do polinta hongkod id siibo Abaabazan Kosimbanan Dahabus Kakadazan.
Nokosoguhu dino, pinapabaagi i Yahya suat kuasa nokotoimo pomohizan tangki 1Malaysia kuminaa kiginumu 433 mogiigizon mantad 31 kampung id posoihi Putatan i huminansan mohoingon kampung om ponikoon Komiti kikuasa Kobuuon om Koumohigan Kampung (JKKK).
|
