|
31st July, 2012
KOTA KINABALU: Kumoduvo Vozoon Montili Sabah Datk Seri Yahya Hussin pinopohombus do topiumanan au asantaban ginavo miampai asil kalaja kuntilikto id suang monoodo Projik Koponoinaan Infrastruktur Ginumuan (PIA) om Projik Infrastruktur Kopoguhu (PIAS).
Miampai minokianu kuntilikto ngavi manaak pilotian poimponu kumaa kapanadaan projik dino, minoboos isido nadadi tonggungan momongo projik ngavi dino tumanud kootulan miampai ponuuan kalaja di pintantu miaga di tonggungan di pinataak polinta.
“Au zou asantaban ginavo miampai duuduvo projik dino id nombo noihaan talun alun nokubangan, vaig notimung om Projik Pomuhominan Sakadai Layat (PBR) nga au kosontob ginavo tu pamasangan vavazaan au pointantu om soomin jinjila au pinosokot do pointunud.
“Miampai dino, mokianu zou do kuntlikto monoodo dino miampai tavavasi dati tu onu i tuhungon dotokou diti tuhun di tongosusa,” ka disido kuminaa magaganu abal kahapas tuminombuhui Projik PIA/PIAS om PBR Fasa 2 di Jalan Kampung Sekambu om PBR Kampung Sekambu, Putatan id doiti, di koniab.
Yahya i nogi Montili Pomutanaman om Pomounan Taakanon Sabah minoboos kalaja ngavi di au pointantu dino kapanaak tanda talaat kumaa layat montok kaanu kouhanan infrastruktur nokogompit.
Kopiondot dino, minoboos isido boogizan disido monuat suat kumaa Upis Uvang Putatan mooi koponoinaan nuununu projik miampai tavasi hoohobi no kozo id suang ahal kopomihian kuntilikto di kaanu montok monoodo nuununu projik.
“Upis uvang mositi do hobi miingat-ingat id suang momihi do kuntilikto di kipotutan,” ka disido.
|
