|
24th July, 2012
KOTA KINABALU: Koimaan do pamajakan di kananangai ginavo popoinsavat gatang om ginumu kopotikidan di au atantu, manaak kobohingkaangan kumaa doid dudumagang daging id posoihi Kota Kinabalu.
Maza pinonoihian di minaan do New Sabah Times id Pasal Tagazo do doiti di konaib, noihaan do kogumuan dudumagang daging mongomu miampai kozuuzuvo dioho do baino diti id nomboo do asansagan maganu daging miampai gatang di takavas mantad pamajakan, maso ko gatang ko gatang i dagangon id dagang do babaino diti kakaal au nokoinsavat.
Gisom baino diti, gatng montok sokilo daging nopo nga RM22, daging poo (RM18/kg), tuhang kangkab (RM16/kg), om tuhang toomod (RM14/kg)
Sikap pemborong yang sesuka hati menaikkan harga dan jumlah bekalan yang tidak menentu memberi kesusahan kepada penjual daging di sekitar Kota Kinabalu.
“Nung tonudon gatang do baino diti, kakaal po osiibo nga nokoinsavat no do boogizan pamajakan gatang ontok Ramadan diti,” ka do songuhun mongingindapu daging, i Haji Amin Mahali.
Om ka disido, suvai ko mantad kobohingkaangan miampai noogizan pamajakan, koonuan daging do baino diti nga somoonu do obohingkang kozo montok kaanu tu kogumuan do moninikid id posoihi Sabah, momihi montok eksport daging dioho kumaa Brunei, tu gatang panaak doiho nopo nga hobi kinavas.
Ahal diti notumbozo do songuhun po vagu dudumagang daging, i Peter Chok, i kikopiumanan do kobohingkaangan diho.
Ka disido: “Nung kaanu zikoi gatang tomula, mositi no do dagangon dagai miampai omula, nga asansagan nogi zikoi do momohi miampai gatang tapagon”.
Mantad diho, boogizan mongingindapu id pasal nokomoi, mokianu kumaa boogizan kokuasaan mooi do kaanu popoinsavat gatang daging montok monginggaan simbagat di tonggungon dioho.
“Okon ko mimang zikou do poinsavaton o gatang miampai akavas tu koiho do kobohingkaangan di otoguvang do tuhun ginumuan, nga mikunomo no nung aanu o gatang poinsavaton id posoihi RM1,” ka di Peter.
Ahal diho nga nopiumanan nogi do mongingindapu manuk id nomboo izioho do asansagan momohi miampai gatang di apagon mantad boogizan pamajakan.
Tumanud do songuhun monginindapu manuk do doiho, i Zulfikar, gatang montok songinan manuk posonginan do baino diti nopo nga RM9.50 iso kilogram om pisosoomo do koinavat po vagu tu koimaan do pamajakan i tomoimo popoinsavat gatang manuk, hobi no kozo minsosomok Aidilfitri do tiinu.
“Di poguhui vuhan mogkodos, gatang di aanu padagangon nopo nga RM9, nga baino diti, asansagan do gatang do poinsavaton, sundung au po sominggu o tuhun Islam do monoguvang ibadah diho,” ka disido, naamot au minogohim do gatang manuk posonginan pisosoomo do koinsavat hobi RM10 iso kilo minduduuk Aidilfitri diti.
Suvai diho, id pinonoihian isooi, noihaan o gatang sada om asil ponginsadaan daat nga nokoinsavat nogi miampai oindamaan tu ahal koozuvan tavan di au natantu.
|
