|
|
|
MONTOK KAANDAMAN… Jainab minokigambal montok kaandaman songovian do vinakas mongigia do Royal Group.
|
24th July, 2012
KOTA KINABALU: Ponguasaan do susumikul ngaavi pangan tosiibo id boos Onggilis i sabaagi vookon boos sompomogunan di koiso nopo nga kiguno montok papavasa dioho do abaa monongkionit id boos nokomoi, hobi no doid ponoguvangan ponginaman timpu globalisasi.
Minoboos i Panakadai Montili Kotundaan Ontodonon om Teknologi Kopoihaan, Datuk Jainab Ahmad do humansan o boogizan disido do hobi ginumu susumikul hobi no id Sabah do kivaa kabaahan mamalati om moboos id boos sompomogunan diho i sabaagi iso kabaahan po’uangon kumaa ponguasaan boos Malazu di tapantod.
Ka dosido, au ogumu mokiki’ia sikul pangan tosiibo id pogun Sabah diti i kokuasa boos Onggilis miampai avasi, om hobi kopotongob, kivaa di au toomod kalati dino.
“Ponguasaan boos Onggilis nopo nga kiguno, hohobi po id timpu globalisasi om ICT do baino diti. pambalajalan boos Onggilis id suang kalas nopo nga au kogonop montok monguasa boos diti miampai avasi.
“Mositi o susumikul ngaavi momoguno dino id suang koposizon tikid tadau. Ada koikumai montok monongkiboos id boos Onggilis, balajal no mantad toihaan. Songian do asaasau monongkiboos id boos onggilis, ponguasaan do boos diho koingkavas id tikid timpu,” ka dosido.
Noboos dosido iti di ontok minonutuzan pinopoimagon Abaabazan Boos Onggilis Royal Group id Sepanggar, somok doiti di koniab, i pinopokito do susumikul mantad tohu sikul di nopihi montok mimbalajal boos Onggilis miampai aiso kabalai.
Jainab, zosido ponogi i Puu Hintuun Koundangan Pogun (Adun) Uvang Karambunai, minoboos do suvai ko timpu pambalajalan mato balajalan Onggilis, au ogumu susumikul do mambasa buu Onggilis, nunu po vagu do monongkiboos doid boos sompomogunan diho.
“Boos Onggilis nopo nga apagau kozo adadi medium monongionit. Au izioho mongintong abaabazan Onggilis id tilivison, mintong noopo nung kivaa suat dahin boos om suat kalatas abao om nogi buus abal i basaon dioho i kiboos noopo Malazu,” ka dosido.
Ka dosido, au oohim o boos Malazy nadadi somboogizan mantad koposizon dotokou om sohihinaid do adadi boos poimagon, mositi toguvangon do katapatan do boos Onggilis nopo nga sabaagi bakaang pionitan koiso id pidagangan om sains id pototongkop vinoun.
Mantad diho, minongunsub i Jainab doid tina tama om mongingia montok songovian manakadai popoingakavas ponguasaan boos Onggilis om kaanu mongiho do tanak momoguno boos diho do asaasau.
|
