|
18th July, 2012
SANDAKAN: Ponundunan pongindapuan soginumu RM69.155 lizong i pinahabus do Majlis Amanah Rakyat (MARA) pogun Sabah, pinopogompit ginumu mononoimo soginumu 851 tuhun di toun nakatahib.
Minoboos i Kumoduvo Huguan Potunud MARA (Keusahawanan), Haji Mohd Rosdi Ismail do mantad ginumu diho, soginumu 701 tuhun tinimungan kuntiliktor bumiputera id pogun Sabah diti nga nakaanu nogi ponundunan maza Skim Pembiayaan Kontrak Ekspres (SPIKE) miampai ginumu kopohobusan soginumu RM62.907 lizong.
Ka disido, montok toun diti nopo nga mongumbangan o MARA soginumu RM75 lizong kopohabusan ponundunan montok skim ngaavi ponundunan di kivaa poinsandad id nomboo do gisom di ko 30 vuhan Koonom nakatahib, pinapahabus o Upis Mara pogun Sabah do ponundunan soginumu RM61.421 lizong.
“Id nomboo mantad ginumu diho, ponundunan SPIKE di pinahabus soginumu RM75.529 lizong montok monundun projik ngaavi mantad oginsi kopolintaan om nogi komponi GLC’S di nopihi.
“Papaanjul nogi o boogizan ponundunan pongindapuan MARA do piipio skim ponundunan di hobi kompetitif om kivinakas piohian mipahud miampai kosimbanon timpu montok monumbozo hizab do kopolintaan doid kopoimbuhazan tuhun id kaganaan pidagangan om pomounan bumiputera mooi do kaanu monongkiahi id vinoun pongindapuan di kikoimaan ‘Blue Ocean,” ka disido.
Noboos disido iti di ontok pinopohombus pason pinopoimagon do Abaabazan ‘Engagement’ Mara miampai mononoimo om i kotoimo do kouhanan MARA, id iso hutil do doiti di koniab.
Potindapou nogi i Potunud MARA pogun Sabah, HAji Kamaruzdzaman Md Ali om piipio upisol MARA om nogi popopobuu ngaavi Bumiputera uvang Sandakan.
Mipahud miampai toguvangon om tonggungan di ponuu, minoboos i Haji Mohd Rosdi do ihoon kozo disido o transformasi toguvangon do MARA do kapanau miampai avasi om kivaza, kaampai no do tomoimo maganu pinggisoman montok momo’uang vinasi kotoinaan montok monumbozo kaandak do popopobuu ngaavi Bumiputera.
Okito disido o abaabazan miaga diti nopo nga iso impoon di tavasi id kobuzuan popohuzung kopoihaan di kivaza kumaa doid tinimungan umbanganon, hobi no doid popopobuu Bumiputera di kogompit id mogisuusuvai kaganaan pongindapuan.
Mantad diho ka disido, monoodo o boogizan MARA do palan strategic MARA 2011-2020 montok papapanau pinggisoman do kotinanan diho miampai hobi kivaza doid koponumbozoan ponoomo do Bumiputera do baino diti om timpu mikot.
Naamot diho, id ahal transformasi ka disido, monoguvang kalaja o kaganaan popopobuu sabaagi monuung montok popoimbuhai popopobuu ngaavi kavavagau om papavakas do popopobuu di kivaa poinsandad.
Ka disido, pinggisoman diti nopo nga otuhuk maza ponginsomokan poinsompuu miampai pongumbanganan kumaa do kotundaan popopobuu, pongukaban kosivatan pongindapuan, sakadai pamasalan, pomungaanan om kopotoundaan pukuon.
Ka disido, montok mamantod po vagu transformasi diho, mogisuusuvai pinghudaan pomouan nga pinotounda nogi.
“Mantad diho, maza ponginsomokan miaga diti, otumbazaan tokou do kaanu popoimbuhai tinimungan mongingindapu korporat, tekno pongindapuan, popopobuu runcit om popopobuu panadaaan om nogi kuntiliktor di hobi kivinakas monongkiahi,” ka disido.
|
