|
18th July, 2012
KUALA LUMPUR: Pinapagais i Tan Sri Muhyiddin Yassin di koniab do apat kopokianuan toi kriteria kiguno montok koonduan Malaysia, monguhan taantob om kahantoi doid kaganaan tososondii.
MInoboos i Kumoduvo Huguan Montili do mositi o koonduan id Malaysia do potounda poimponu montok tumoguvang tundoonok kavavagu, monumbozo kopokionuan timpu mikot om gumonop sondii miampai kabaahan om toihaan kavavagu, avasi id pongindapuan, pionitan, teknologi toi kaganaan ngaavi suvai.
“Koiso, mositi ko do monuidong koimauan montok monongkiahi om sanhaang id doguhu id potitikid timpu,” ka disido di ontok pinopotimpuun Pitimbungakan Hunduk Koonduan ko-10, do doiti.
I koduvo nopo nga mamantod koimaan positif om ahansan miampai koimauan sondii montok monguhan taantob, ka disido.
Minoboos isido do miapai noopo mamantod koimaan positif, kaanu izioho mongukab kosivatan om dumadi moninimpuun id kaganaan tososondii.
Potindapou nogi diho i Montili Kotombuhuzan, Datuk Seri Dr Ng Yen Yen om i Kumoduvo Montili Kotundaan Koonduan, Paganakan om Mogiigizon, Datuk Heng Seai Kie.
Minoboos i Muhyiddin do ahal kotohu montok humantoi nopo nga mositi o ponimpuunan do kivaa iso i poinhohobi montok pataakon i manaak kounalan totopot.
“I kaapat, mositi kivaa kosivatan montok papavasa do tinimungan koonduan di avasi kahantazan,” ka disido.
Suvai diho, Muhyiddin, isido ponogi i Montili Balajalan, minoboos do pambalajalan nopo nga sabaagi factor kahantazan kritikal montok popobuu do tinimungan koonduan id pomogunan Malaysia diti.
Minoboos isido do miampai poinsanganu binalajalan di hobi vinasi toi kahantazan akademik di hobi kinavas, kaanu o tinimungan koonduan do tumabung id kaganaan professional i di poguhui diti nongkuban do tinimungan kokusazan.
Minoboos i Muhyiddin do gisom di vuhan Koonom nakatahib, koonduan id koongkuban 63.2 piatus mantad upisol nipon id Malaysia, akauntan (49.6 piatus), loyal (49.2 piatus) om upisol pongusapan (46.2 piatus).
Minoboos isido do statistic diho pinopokito kinoinsavaton om trend tavasi kogompitan do koonduan id kaganaan professional, suvai ko kivaa di minongigit kalaja mononoodo koputusan miampai kotinanan kiguno do kaganaan ekonomi.
“Otumbazaan zou do Malaysia nopo nga vookot di piipio pomogunan id vinoun i kivaa hahansanon koonduan tavakas sabaagi mononoodo koputusan id nazatan mononoodo impoon om regulator id kaganaan ekonomi,” ka disido.
Suvai diho, avasi nogi ponoimaan di Muhyiddin doid pinggisoman do Komontilian Kotundaan Koonduan, Paganakan om Mogiigizon montok misokodung miampai do Talentcorp montok popoingkavas kaampazatan do koonduan id pasalan pakalajaan.
Minoboos isido do iho nopo nga mipahud miampai umbanganon 55 piatus kogompitan do koonduan id pasalan pakalajaan oikot 2015.
Montok monumbozo hizab diho, minoboos i Muhyiddin do iso hongkod data koonduan professional i kihizab montok gumuhi kumalaja do potimpuunon vuhan Kosizam diti.
Nazou nogi disido o kinopongozuvan pitimbungakan hunduk diho i tumanud disido, nadadi impoon koguno kumaa doid koonduan Malaysia montok miihang pombiian montok popoinsavat kahantazan id gontob hobi kinavas.
Maza pitimbungakan hunduk diho ka disido, ogumu unsub om resolusi do tinimbang om poonjulon do kopolintaan kaampai no impoon 30 piatus koonduan id nazatan mononoodo koputusan, pongoputan suti maganak om koatulan kalaja sapalu timpu.
Pitimbungakan hunduk sangadau diho i nazu do Komontilian Kotundaan Koonduan, Paganakan om Mogiigizon diho nopo nga tinindapou do kiikila 1,000 mumumpazat mantad suang om habus pogun.
Onom nuhuvan piniboosan id piipio pangan, kaampai no kokomoi “Women Readiness for Economic Transformation”, “The Progress of Woman om Technology” om “The 21st Century Talent”.
|
