|
|
|
Vozoon Montili Datuk Seri Musa Aman ontok minongkiboos miampai di Datuk Hajiji Haji Noor om Datuk Dr Ewon Ebin om puu ngavi DUN Suvai poguhui pitimbungakan Dewan Koundangan Pogun pinotimpuun di koniab.
|
18th July, 2012
KOTA KINABALU: Mongkimamaa kozo polinta monguang kinavas komosikinan id pogun diti, ka di Montili Kotundaan Dahabus Kakadazan Datuk Dr. Ewon Ebin.
Minoboos isido, iti pointahang songian ponguangan kinavas komosikinan mantad 24.2 piatus ontok toun 2004 kumaa 19.7 piatus ontok toun 2009.
Suvai mantad dino ka disido, kinavas komosikinan id piipio boogizan pogun diti nga nahantoi pinotuun hoohobi no kozo id boogizan Tisan Kotonobon om sokid ino nopo nga noktuun 14.1 piatus kumaa 8.0 piatus id Tisan Kotonobon om mantad 29.0 piatus kumaa 15.8 piatus id sokid.
“Polinta minonoodo mogisusuvai haang montok humantoi tuduvan mongumohig komosikinan id pogun diti hoohobi no kozo mongidu noindamaan mosikin.
“Montok angkab dino, polinta pogun om hongkod minonoodo abaabazan ngavi miaga do MESEJ, Agropolitan, Abaabazan 1Azam, Abaabazan Popoinsavat Ikonomi Posoihi (PPES), Pomutanaman PPRT om Abaabazan Sakadai Hamin montok popoinsavat tangangazan om kualiti koposizon tinimungan ikoton,” ka disido.
Minoboos isido dino ontok minonimba tudizo Puu Dewan Koundangan Pogun (Adun) Sindumin Ahmad Bujang ontok sesi misimba, pitimbungakan dewan koundangan pogun, id doiti, di koniab.
Minoboos i Ewon, suvai mantad dino, pongkimamaan popoinsavat kualiti koposizon mogiigizon dahabus kakadazan nga pinolipat mazaa abaabazan Kaganapan Vaig Dahabus Kakadazan om Kaganapan Lotilik Dahabus Kakadazan id siibo Boogizan Keberhasilan Kopoguhu Pogun (NKRA) Infrastruktur Kopoguhu Dahabus kakadazan.
Ka vagu disido, projik Pomutanaman PPRT Kalabakan om Pomutanaman PPRT Tongod pinapahabus asil om kiginumu 1,167 monongkibai pomutanaman dino babaino nokotoimo dividen RM400 sombuhan.
“Polinta pogun minongintutun iso vagu uvang id boogizan sokid ogun diti montok pobuuon sabaagi Pomutanaman PPRT tumanud kumaa asil pinonoizukan i maamaso papanaon,” ka disido.
Minoboos isido, komontilian disido babaino maamaso monoodo 44 projik MESEJ id pototongkop pogun popoompit 29 MESEJ Pomutanaman, onom MESEJ Akuakultur, duvo MESEJ Bersepadu om tuu MESEJ Mikro.
“MESEJ Sg. Laba, Pulau Sebatik Tawau, MESEJ Bunang Sook Keningau om MESEJ Lanung Tongod nopongo’ poimponu dino om noizanan do monongkibai ngavi abaabazan,” ka disido.
Minoboos i Ewon, MESEJ-MESEJ Akuakultur Nala, Tungku Lahad Datu, Pangi Kudat, Lok Buntun om Gelam Gelam, Semporna, Kg. Bahanan, Pulau Jambongan, Beluran om Panimbawan Tuaran nakahantoi pinopoinsavat tangangazan monongkibai tumahib gais noindamaan komosikinan suvai ko aanu popoinsavat kualiti koposizon mazaa pomuhominan amenity sosial di suvai.
“Id saviavi dino saviavi projik ngavi MESEJ songian do opongo poimponu dino kaanu popoompit hobi 1,700 Huguan Suang Hamin Noindamaan Mosikin,” ka disido.
Ka disido, Projik Agropolintan id siibo Koridor Kotundaan Pogun Sabah ino nopo nga id Tongod, Kota Belud, Pitas, Kemabongan om Beluran babaino id suang mogisusuvai kinavas kapanadaan.
“Agropolintan Pulau Bangi i maamaso id suang kapanadaan do Felcra pisosoomo kaanu popoompit 450 monongkibai noindamaan mosikin songian do opongo poimponu,” ka disido.
Minoboos i Ewon, id siibo Abaabazan Sakadai Hamin Polinta Pogun i tinoodo do upis ngavi uvang pototongkop pogun kiginumu do 6,549 hamin kavavagu todoon i pisosoomo opongo kohimpupuson vuhan diti.
“Abaabazan diti pinointutun id siibo NKRA Asas Dahabus Kakadazan ontok toun 2012,” ka disido.
Naamot dino, ontok minonimba tudizo Adun Likas Datuk Liew Teck Chan kokomoi kapanadaan sunsuzon tazid sumoboong Bavang Bambangan id Kg. Kionsom om kapanadaan sunsuzon tazid id kampung ngavi suvai id pogun diti, minoboos i Ewon, sunsuzon tazid sumoboong bavang Inanam nopongo no minongumbasi ontok ko 8 Vuhan Koonom nakatahib mazaa sakadai poimbida Adun posoihi.
|
