|
17th July, 2012
KOTA KINABALU: Lahan sumuang koduvo kisinodu 0.9 kilometer i adadi lahan koiso kumaa id Hinominon Hintuun Koundangan Pogun Sabah, id Likas do doiti, nukab miampai poimagon di koniab.
Abaabazan kinopomoiganan toduuk do lahan diho nopo nga pinoimagon di Vozoo Montili Sabah, Datuk Seri Musa Haji Aman, id vazaan sumuang do lahan nokomoi, id somok do hinominon Wisma Innoprise di kiikila jaam ko 8.30 doungosuab koniab, sanjaam satanga poguhui pangan tadau koiso do Pitimbungakan Hintuun Koundangan Pogun (DUN) Sabah do pinotimpuun.
Potindapou nogi diho i Kumoduvo Vozoo Montili, izioho nopo nga i Tan Sri Joseph Pairin Kitingan, Datuk Seri Yahya Hussin om i Datuk Dr Yere Moh Chai, Momumuntu Hintuun Koundangan Pogun i Datuk Seri Salleh Tun Said, montili ngaavi Kabinet om panakadai ngaavi montili om i Potunud Koupisan Kalaja Tagazo (JKR) Sabah, Datuk Ir John Anthony.
Id kopointahangan toniibi di Ir John, minoboos do projik pinanadaan lahan kigatang RM15.9 lizong diho nopo nga pinotimpuun di ko 28tv Koopod 2010 om pisosoomo opongo poimponu dino do vuhan Koopod toun diti.
“Baino diti, maso o boogizan kuntiliktor do momongo kalaja ngavi lanskap, popotuidong sumbu lahan om monoodo husap manamong kumaa id Hinominon Hintuun Koundangan Pogun om pisosoomo dotokou o savi avi kalaja ngaavi diti do opongo id suang timpu di pinatatap,” ka disido.
Minoboos i Ir John do pinanadaan lahan vagu diho nopo nga kapanakadai monguhan kobohingkaangan kobobohan talun alun kumaa id Hinominon Hintuun Koundangan Pogun, nunu po vagu do songian o projik Hongkod Pentadbiran Sabah i maso id panadaan id kinoizonon diho do opongo tiinu.
Hongkod Pentadbiran Sabah i kigatang kiikila RM388 lizong diho nopo nga popoizon mogisuusuvai upis do komontilian, kaampai no upis id siibo ponoinaan do Koupisan Vozoon Montili om Komontilian Kousinan i pointongkop id posoihi do kakadazan tagazo diti.
|
