|
17th July, 2012
KUALA LUMPUR: Kiginumu 2,500 layat Malaysia tinaan id tolungku dahabus pogun id mogisusuvai kahasaan id suang onom vuhan koiso toun diti, pitimbungakan Dewan Pogun pinoiho di koniab.
Kumoduvo Montili Dahabus A. Kohilan Pillay minoboos vookon kahasaan tinoodo nopo nga mogohimu dadah, momoduso, minomilasu kad kredit, kahasaan komersial, manakau, kahasaan imigresen, momoduung miampai momilasu suat om kopogohimuvan tuhun.
“Vookon pogun i nakapanaan tuhun Malaysia nopo nga Singapore 1,096 tuhun, Thailand (444), China (231), Indonesia (148), Taiwan (137), Australia(77), Sepanyol (47), Kuwait (33), Vietnam (29), om Perancis kiginumu 25 tuhun,” ka disido ontok minonimba tudizo Senator Datuk Chin Su Phin.
Minoboos i Kohilan, tomoimo polinta osianan kumaa nasip om kotundunan layat Malaysia i tinaan id dahabus pogun, nga au mamung kotoinaan saahom pogun dino.
“Mongkimamaa komontilian mintamong kopotutan layat dotokou miaga di poinsuang id siibo undang-undang pogun dino om nogi undang-undang sompomogunan miaga do Konvensyen Vienna Kokomoi Pionitan Konsular 1963,” ka disido.
Minonimba tudizo pinouang puu di miaga kokomoi nung kivaa undang-undang i papasaga di pointolungku tuhun Malaysia montok oviton mahik, nga komontilian maamaso monoizuk om popotounda protocol ngavi miampai kalalahano kapanadaan montok mogovit mahik di pointolungku papanau ukum id pogun diti tumanud Akta Tolungku 1995 om Kootulan Tolungku 2000.
“Iso komiti kikuasa tinuidong do Komontilian Suang Pogun miampai Komontilian Dahabus Pogun, Komontilian Kotundaan Koonduan, Paganakan om Mogiigizon, om Koupisan Tolungku montok popotounda undang-undang Akta Kopoundohian Sompomogunan montok mogovit mahik layat i tinaan id dahabus pogun,” ka disido.
|
