|
17th July, 2012
KOTA KINABALU: Montili Kotundaan Mogiigizon om Ahal Momoguno Datuk Azizah Mohd Dun minoboos, kiginumu 1,392 tanak sampapanau tinampasi mantad po toun 2007 gisom Vuhan Kohimo toun diti.
Sundung i do ingkaa ka disido kogumuan pinoidu om 65 po tanak kakal id suang Hamin Panamangan Koponuhungan Kota Kinabalu.
“Komontilian ku mazaa Koupisan Kotoinaan Kotundunan Sabah au kogompit miampai pinghudaan kumaa pakalajaan kumaa tanak ngavi sampapanau.
“Koupisan dino kogompit nopo id suang manaak kotoinaan mantad boogizan kotundunan tanak sampapanau suvai ko popotounda balajalan kopotuhu miaga do kelas balajalan 3M, kelas agama om balajalan moral, poguhudan tinan sondii, kololoizan om kobuuon saviavi tanak ngavi dino,” ka disido.
Minoboos isidod ino ontok minonimba tudizo Puu Dewan Koundangan Pogun (Adun) Kiulu Datuk Louis Rampas ontok sesi misimba, pitimbungakan dewan koundangan pogun, id DUN id doiti, di koniab.
Naamot dino, Panakadai Montili Kotundaan Mogiigizon om Ahal Momoguno Datuk Herbert Timbun Lagadan minoboos, gisom baino kiginumu 2,350 Skuad Momoguno toi ko Sukarelawan Mongintong Hoogo pinihi id pototongkop pogun.
“Ikoton Skuad momoguno montok pototongkop Sabah nopo nga kiginumu 5,000. Onuan izioho pinghudaan id suang boogizan kasaavan kopomogunaan om mamalati vahu hak om tonggungan momoguno.
“Guno Skuad Momoguno nopo nga dumadi mongingintong om poposogu trend gatang babaino kumaa Komontilian Pidagangan Suang Pogun, Kopolitif om Kopomogunaan (KPDNKK),” ka disido ontok minonimba tudizo Adun Gum-Gum Datuk Zakaria Mohd Edris.
Minoboos i Herbert, tinimungan dino nogi poposogu kahasaan toi ko haang humasa undang-undang toi ko kootulan id siibo KPDNKK.
“Skuad Momoguno aiso kuasa montok maganu haang kumaa onu nopo kahasaan i tinoodo do mongindapu nga izioho adadi mato om tohingo polinta mazaa KPDNKK,” ka disido.
|
