|
17th July, 2012
KOTA KINABALU: Pinapahantoi di koniab do Hintuun Koundangan Pogun (DUN) Sabah do Rang Undang-Undang Tana Sabah, i vookon suvai dino au papavasa do hivang disan daat id kakadazan tagazo Kota Kinabalu onuan kosinganuan kumaa doid boogizan suvai.
Di poguhui diho, ontok pinapabantang rand undang-undang diho montok papadahin Ordinan Tana Sabah 1930 id pitimbungakan Hintuun Koundangan Pogun do doiti, minoboos i Montili Id Koupisan Vozoon Montili, Datuk Radin Malleh do hinaab tana di kogompit nopo nga 1,550 hektar id hivang disan daat Tanjung Aru gisom Suok Hikos, somok doiti.
“Impoon om gais tonudon di kivaa poinsandad i gunoon pakazon do babaino nopo nga noihaan au kogonop montok mangantob kosingonuan tana id kinoizonon nokomoi.
“Pamadahinan id rang undang-Undang diti nopo nga ponginsomokan tavasi kozo montok mongumohig do hivang tana polinta pogun di pointantu i mositi umohigan poimponu miapai aiso nuununu kovaizan om kotongoban, hobi no kumaa doid boogizan ngaavi pointantu i dati maganu kosivatan maza proses koundangan,” ka disido.
Pinopointahang nogi i Radin do kobobohan kotundaan pogun Sabah do babaino nopo nga okon ko undoiton montok popohubuk tungkus sadad pogun.
Ka disido, kotundaan di au nouhud nopo nga kopomiumbak noopo sadad pogun, kogingahan, kohobizanan om lanskap do kakadazan Kota Kinabalu.
|
