|
16th July, 2012
TENOM: Popotounda o Kolob Momoomoguno Uvang Tenom do Pangan Momoomoguno Uvang Tenom i poinhongkod id Upis Unit Buuan Kobuuon Layat (UPKR) Uvang N.35 Melelap.
Upis pangan momoomoguno diho nopo nga manaak hivang kumaa doid savi avi boogizan mogiigizon, hobi no do momomohi om momoomoguno do poingkuo izioho hobi koiso savi avi gantang kuampo tamangan mooi do au izioho guugunoon do mongingindapu ngaavi di aiso tonggungan.
Pinoboos di Panakadai Montili Kumaa Di Vozoon Montili, Datuk Radin Malleh o ahal diho di ontok pinopoimagon Abaabazan Kopipiumanan Kopomogunaan Uvang Tenom i nakaanjul id bantaan poingukab Sedcovest, do doiti di tadau Koonom.
Radin, isido ponogi i Puu Hintuun Koundangan Pogun (Adun) Melalap, minoboso do pongukaban hivang momoomoguno id uvang diti nopo nga kopoimbuhai mogiigizon di tabaa om kitoihaan songian izioho do kumaandak momohi bakaang di gunoon.
“Kaanu nogi iho manaak kopipiumanai kumaa doid tuhun ginumuan songkuo guno dino toihaan mantad ahal kopomogunaan mipahud miampai tudu do polinta montok papaanjul abaabazan miaga diti montok manaak kounalan kumaa doid tuhun momoomoguno,” ka disido.
Abaabazan sangadau diho nga pinosuang nogi duvo boos booson, vookon dino nopo nga “Kopokionuan Tribunal Momoomoguno” i pinohombus di Huguan Seksyen Kopokionuan Tribunal Momoomoguno KPDNKK Kota Kinabalu, i Jaidah @Noraini Usok om “Kopotutan Ngaavi do Momoomoguno” pinohombus do KPDNKK Keningau, Fadly Asbi mantad KPDNKK Keningau.
Potindapou nogi doid abaabazan diho i Salim Gabot, hinansan di Monunuat Pointatap Komontilian Kotundaan Mogiigizon om Ahal Momoguno Sabah, Upisol KPDNKK Keningau i A. Runji Abdul Hamid, Huguan Uvang Tenom, i OKK David Jani, upisol ngaavi kopolintaan, buuan ngaavi mogiigizon, kaampai no kapitan ngaavi Sina id uvang diti.
|
