|
|
|
Tawfiq minonoimo tanda kaandaman mantad di Mohd Dahali.
|
16th July, 2012
KOTA KINABALU: Sinuu o tinimungan komuhakan mooi do tumabung om monongki’aau kosivatan di kivaa id kaganaan pongindapuan id pogun Sabah diti.
Minoboos i Panakadai Montili Kousinan, Datuk Tawfiq Abu Bakar Titingan do kopolintaan id siibo kopomuu’anan di Huguan Montili Datuk Seri Najib Tun Razak om di Vozoon Montili Sabah, Datuk Seri Musa Haji Aman nopo nga pinopotounda kopoobian tagazo montok momohodi modal tuhun kalas koiso.
Suvai diho ka disido, pinopotounda nogi o kopolintaan do mogisuusuvai sakadai pagahasan om kouhanan, kaampai no pinghudaan montok manakadai do tinimungan komuhakan doid kaganaan pongindapuan.
“Ahansan zou do maza abaabazan diti, buuan komuhakan, popopobuu om i dumadi popopobuu komuhakan do kalati toguvangon om tonggungan dioho montok mongiho kozo do kahantazan om kotundaan di opiumanan baino diti do aanu tihombuson om poingkavason po vagu id timpu mikot,” ka disido.
Noboos disido iti kuminaa doid magaganu abal di kahapas pinopoimagon Pitimbungakan Buuan Komuhakan Mogovit Transformasi Ekonomi Vagu, id Palace Hotel, do doiti di koniab.
Potindapou nogi diho i Potunud Koupisan Komuhakan om Sipoot (Pisompuuvan) Sabah, Mohd Dahali Haji Matsin, Polosidin Kounsol Komuhakan Sabah (MBS) Kevin Lim om mumumpazat ngaavi.
Pitimbungakan tohu tadau diho nopo nga numpazat do 152 tuhun mantad pototongkop pogun Sabah, kaampai no 16 tuhun mantad Tana Pisompuuvan Labuan om 10 mantad Sarawak i mantad do buuan ngaavi komuhakan, mongingindapu om hahansanon mantad Institiut Ponginobosan Takavas Polita om Swasta.
Minoboos i Tawfiq do mositi o komuhakan ngaavi do tumounda sondii id savi avi undovoon, kaampai no papatantu tudu, popoingkavas kabaahan, tinaan mental om vinakas id suang montok papavasa dioho do monongkiahi id vinoun pongidapuan di kiponginaman kozo.
“Montok dioho di aanangan tumabung id vinoun pongindopuan, hobi vinasi do monimpuun pongindapuan id tukuan tonini do hobi poguhu papahaab skop pongindapuan id tukuan di hobi ginazo.
“Ada koikumai monimpuun pongindapuan miampai onini tu kokinaman, toihaan om kabaahan papapanau pongindapuan nopo nga kiguno kozo montok kahantoi, susuutonon do papahaab pongindopuan dotokou,” ka disido.
|
