|
16th July, 2012
KOTA BELUD: Minokianu i Kumoduvo Huguan Tinan Pionitan Umno Sabah, Datuk Seri Salleh Tun Said Keruak doid puu Umno mooi do manaak kopoguhuanan kumaa doid hinuduk om pisompuuvan montok mongiho kozo do kotihombusan koundunan id paati.
Minoboos isido do iti nopo nga kiguno tu paati no i monuidong do polinta om okon ko tuhun tososonguhun.
“Mositi tokou do ouhi kumaa doid koundunan dotokou om au mogohundaat do paati. Mositi o hinuduk do potindoozon id po’ompus timpu montok mongiho kozo do vinakas paati,” ka disido di ontok pinopoimagon pitimbungakan hahansanon Umno boogizan Kota Belud, do doiti di konaib.
Salleh, isido ponogi i Huguan Umno Kota Belud, minoboos do potitikid puu mositi popokito kohudukan kumaa doid paati om okon ko umundun satanga no ginavo montok kounalan sondii.
“Au tokou mimang do tuhun di popokito noopo voos id suang paati dotokou,” ka disido om minoboos vagu do koundunan montok paati nopo nga mositi potihombus id sampaping popoguhu kounalan do paati mantad ko nunu noopo.
Minonuu nogi i Salleh do puu ngaavi paati do kikoimaan opulokis montok popotohid ningkokoton tavasi do Umno.
“Mimang tokou dioho do mongigit ponginsomokan tosuau layat, popobibi ego om koimaan montok noopo sondii. Mositi tokou do popokito koimaan toomod mooi do tomoimo okito do layat o paati sabaagi popoguhu kavasian.
“Ada tokou intangan osiibo kabaahan om toihaan do mongungundi dotokou. Mositi tokou kivaa toihaan, kiponimbangan om profesional doid ponginsomokan dotokou miampai aiso sinabi, hobi no doid kopointahangan hizab om polisi do paati,” ka disido.
Isido ponogi i Momumuntu Hintuun Koundangan Pogun Sabah, mokianu do puu Umno do hobi opulokis doid pamalanan dioho montok maganu ginavo om sinoou do layat ontok oikot pomihian tagazo, i kiguno do mikot.
Minoboos isido do nokounonom o Sabah do kotundaan ekonomi di tobobo id siibo di Vozoon Montili Datuk Seri Musa Haji Aman i nakahantoi pinopoinsavat ningkokoton kousinan do pogun Sabah miamoai ginumu pinoopi hobi RM3 bilion, suvai ko minonoguvang kalaja monoodo palan tagazo agenda kotundaan pogun om Koridor Kotundaan Sabah (SDC).
Minoboos i Salleh do Umno Boogizan Kota Belud nopo nga nga monokodung pomuu’anan di Huguan Montili Datuk Seri Najib Tun Razak om di Musa id nazatan pogun.
|
