|
15th July, 2012
TUARAN: Aiso suai i lobi kigatang suai mantad nakaanu kosiwatan montok mongingindapu maimpai kokoriu kakamot momonsoi mee om i tongo kakamot mogonsok kopoobian koporintaan kuminaa di songulun tina kitanak walu, i Juridah Dullah mantad Kampung Serusup, Tuaran, dodoros hiti di kawawagu diti.
Juridah, 39 toun, pinopolombus kounsikahan disio kumaa di toluod mantad koporintaan kigatang kikiro RM4 Ribu katalib do tuminanud kurusus mogonsok om momonsoi mee nayatan watas Tuaran maya ababayn E-Kasih 1Azam miampai 14 tutumanud suai.
“Montok nopo doho, iti sitopot iso toluod i kirati tagayo kumaa doho montok mananampasi dahai sampaganakan do tohuri tadau,” ka disio id rolou kounsikahan.
“Sokurang-kurang miampai toluod kakamot diti, kaanu oku do muhup papagaan kosusaan di sawo ku i monikid tadau pakaraja mogihum kousinan sabaagi monginginsada.
Toluod kiupa kakamot mogonsok om pamagaur tapung dilo pinaramit di Puru Lintuhun Koundangan Pogun (Adun) Sulaman, i Hajiji Noor ontok di tadau Kolimo katalib do minoimagon ababayan dilo doid Lintuhun Kampung Tutu, Tuaran.
Tumanud di Juridah, tanak totuo diolo baino kiumur 24 toun naamot i tanak tomulok diolo kiumur 11 toun om kopongonuan di sawo disio dilo amu i songkuro no akawas montok manampung kopoposion diolo sampaganakan, naamot haro turu po tangaanak diolo i songinsikul.
“Miampai kapaharaan kakamot diti, minggisom oku no di do papalantoi pongindopuan ku sondiri montok manahak kosimbanan kumaa koposion dahai om kikopurimanan montok manambit kokomoi koporintaan do popoimbulai lobi ogumu usahawan kosuul po id watas Tuaran,” ka disio id sunduan poingkawas.
Monongkounsikou po nogi isio kumaa bohogian manganganjur lolobi kumaa Komontirian Komulakan Om Sipoot (KBSS) Watas Tuaran sabap minomili disio sabaagi songulun mantad tutumanud ababayan dilo.
Naamot dilo, i Edward Jawanti, 38 toun mantad Telibong Tamparuli nga nounsikou tu pinatahak kosiwatan mantad koporintaan maya KBSS montok tuminanud ababayan nokomoi.
“Ounsikou tomod ginawoku sabap nakaanu kosiwatan kigatang diti. Isai koilo miampai modal komilaan poompus tuminanud ababayn diti, insan tadau kaanu oku do mongukab pongingindopuan ku sondiri i kinimpohon mee,” ka disio.
|
