|
13th July, 2012
LABUAN: Tinaan do pulis doiti o misasavo, tuhun kinoizonon mantad Kampung Kerupang tu noihaan nokogompit miampai kapatazadan dadah kavo syabu, di ontok tadau Kotohu.
Minoboos i Huguan Pulis Tana Pisompuuvan Labuan, Superintendan Saiman Kasran do misasavo i kiumul id posoihi 40’dan diho nopo nga tinaan id iso hamin sinivaan id Kampung Negalang, di kahapas pinohinuvan do misasavo nokomoi opulokis papapanau tapanazan kapatazadan dadah kavo syabu mantad po di duvo minggu nakatahib.
“Pinapaanjul o pulis do ponohinuvan mantad po di duvo minggu nakatahib om noihaan do kivaa piipio mokikitoina di natantaman do sumuang humabus id suvon hamin nokomoi montok koonuan bakaang tagahon diho om asil mantad pinonugkuan do pulis, nokito duvo pakit polositik toniting i kisuang hinsou Kristal kikotumbazaan do syabu,” ka disido doid iso kopoihaan abal do doiti di koniab.
Ka disido, nokito nogi do pulis o pinompodan tongonini poninizob tiinumon (straw) i kisuang, kikotumbazaan do syabu montok dagangon kumaa doid mananagi dadah, naamot minoboos vagu do syabu diho nopo nga nokito id suang hinimput toodopon do misasavo nokomoi.
Tumanud di Saiman, duuduvo misasavo diho nga noihaan nogi positif dadah di kahapas pinotoguvang pomolisaan vaig sobu doid dioho.
Tinaan reman o misasavo diho sohinaid apat tadau om sontohon id siibo Seksyan 12(2) om 15(1)(a) Akta Dadah Kohigaganan 1952.
|
