|
13th July, 2012
KUALA LUMPUR: Ngaan ponikoon om puu ngavi di mumpazat Suruhanjaya Koponoizukan Diraja kokomoi kobohingkangan modiidikot aiso kasagaan id Sabah pobooson au nodii ahaid, ka di Kumoduvo Montili id Koupisan Huguan Montili Datuk Liew Vui Keong.
“Ontok timpu babaino, maamaso po polinta mindad timpu di kosudong montok monoodo kopoihaan tu ino Yang di-Pertuan Agong no i kaanu momihi dino,” ka disido ontok minonimba tudizo Senator Datuk Paul Kong Sing Chu kokomoi ahal dino ontok pitimbungakan Dewan Pogun di koniab.
Timpuunon Vuhan Koonom nakatahib, Huguan Montili Datuk Seri Najib Tun Razak pinopoboos do nakaakun Kabinet monuidong Suruhanjaya Koponoizukan Diraja montok monguhan kobohingkangan kogompit modiidikot aiso kasagaan id Sabah.
Minoboos i Liew puu suruhanjaya dino pihion id tiniungan dioho i kitoihaan tagazo om kivaa tolotian di taahom kokomoi ahal modiidikot aiso kasagaan id Sabah.
Terma kopongintangan Suruhanjaya Koponoizukan Diraja dino babaino id suang nazatan kohimpupuson kapanadaan montok mongintong terma di pinatantu dino nopo nga saviavi mooi modiidikot aiso kasagaan id Sabah diti aanu monguhan id lahan pointantu, ka disido.
|
