|
|
|
Rosli miampai do upisol ngavi KPDNKK maamaso monoungkou do balang ngavi di nagamu.
|
6th July, 2012
KOTA KINABALU: Komontilian Pidagangan Suang Pogun, Kopolitif om Kopomogunaan (KPDNKK) Kota Kinabalu nakahantoi minagaau somok 100 gumi basaan mogisusuvai ngaan noomitanan pisosoomo kigatang RM435,000 id suang pinonugkuan id iso hamin id Taman Mount Tiara, Penampang, somok doiti, di koniab.
Taktik songuhun sanganu kadai pongindopuan basaan i minamadadi hamin disido sabaagi do stor pomopian mogisusuvai basaan kingaan nomitanan touvi nod ino nosongkou id suang iso pinonugkuan id Taman Mount Tiara, Penampang somok doiti, di koniab.
Pinonugkuan kuang hobi jam ko 2 minsosodopon dino tinoodo iso tinimungan puu om upisol mantad Komontilian Pidagangan Suang Pogun, Kopolitif om Kopomogunaan (KPDNKK) Kota Kinabalu kahapas nakaanu kopoihaan mantad tuhun ginumuan i tumongob miampai abaabazan hamind ino songian saasau tombuhuzon lori kontena miampai van ontok timpu minsusuvab.
Ontok pinonugkuan, somok atus gumi basaan kingaan nomitanan miaga do Adidas, Nike om Levis i pisosoomo kigatang RM458,000 nasamaanan pinovihiu id hivang tombuhui hamin dino.
Huguan Upisol Mongunguasa KPDNKK Sabah, Rosle Abd Hamid minoboos, saviavi basaan nomitanan dino kikotumbazaan noudal mantad China om Indonesia montok kapadagangan pototongkop Sabah.
Ka disido, vookon basaan di nagamu kaampai no jaket kingaan Nike kiginumu 1,330 unit, jaket kingaan Adidas (250), souvai jeans kingaan Levis (2,540), basaan T kingaan Adidas (4,030) om souva toniibo kingaan Adidas kiginumu 4,320 unit.
“Pinonoizukan kopoguhu noihaan sanganu hamin kiumul 52 toun dino minonomod minamadadi iso hamin sampaping hamin disido sabaagi do stor pomopian basaan nomitanan.
“Lahan diti nopo nga kiangkab magampavong boogizan kikuasa saasabap no do saviavi abaabazan kopogonuan basaan om papaatod dino tidoon id posoihi jam ko 2 minsusuvab,” ka disido kuminaa magaganu abal songkoniab.
Ka disido, ontok minonoodo pinonugkuan, sanganu do kadai dino id ponimpunan mogohim kokomoi abaabazan di papanaon disido kaaka dino hamin dino izonon om au popoompi do basaan kingaan nomitanan.
“Sundung i do ingkaa, puu dotokou minomolisa iso hamin misampaping i nogi di natandasan o sanganu om noihaan ngapadan gumi basaan pinoopi id suang hamin dino.
“Otumbazaan tokou sapalu mantad balan diti patazaon montok kapadagangan posoihi mantad no do timpu kalamazan au nodii ahaid,” ka disido.
Ka disido, kiis diti soizukon tumanud Seksyen 8(2)(B) Akta Ahal Pidagangan 2011 i manakadai ukum danda au katahib RM15,000 potitikid balang toi ko tolungku au katahib mantad tohu toun.
|
