|
6th July, 2012
YOGYAKARTA: Tan Sri Muhiyiddin Yassin minoboos balajalan pangaan koonom kavazaan kopomungaanan mahik montok popoinsavat kointutunan dino kopitanud miampai sistom balajalan pra univositi miaga id kolej matrikulasi om hongkod asasi sains.
Kumoduvo Huguan Montili minoboos vookon haang di onuon nopo nga popitongkizad susumikul dino mantad sikul ngavi toomod om popotindooi dioho id hongkod ngavi balajalan poimbida montok pangaan koonom.
“Maamaso izikoi momusoou montok pipiiso pangaan koonom, momoguno do basaan di misuvai, timpu balajal di au miaga, mongingia di au miaga, kategori di suvai tokuudi (id lahan pisuvazan miampai sikul koubasanan),” ka disido kuminaa magaganu abal Malaysia id doiti, di koniab.
Muhyiddin, i nogi Montili Balajalan id doiti mantad po songkoniab tu tuminindapou do mitingan montili ngavi Balajalan Asean om mitingan ngavi kogompit miampai disido i opupusan baino diti.
Kumoduvo Huguan Montili minoboos montok papahantoi atag dino, susumikul ngavi pangaan koonom apatut potindoozon id hongkod ngavi balajalan poimbida tu ginumu dioho babaino soingazad id pototongkop pogun mongkinobos id suang iso toi ko duvo kelas id sikul ngavi nakatantu.
Ontok toun diti, kivaa kiginumu do 83,000 susumikul pangaan koonom om 26,000 susumikul matrikulasi id pototongkop pogun.
Haang montok popitongkizad susumikul pangaan koonom mantad sikul toomod nga kopitanud miampai ningkokoton dioho sabaagi do susumikul pra univositi.
Koubasanan ontok timpu diti mongintong balajalan pangaan koonom nopo nga kotihombusan mantad balajalan pangaan kohimo sundung tu izioho onom nopo nga id kategori di msuvai om hobi pointuutuo mantad boogizan pomumusoou, ka disido.
Minoboos i Muhyiddin kopomungaanan mahik dino kiguno montok mongintogn do pangaan koonom pointantu no do tootopot dino balajalan pra univositi di kopiaga miampai nazatan kolej matrikulasi Komontilian Balajalan om hongkod asasi sains naazu univositi ngavi ginumuan kinoizonon.
Pomumusoou mogiigizon babaino nopo nga balajalan di kolej matrikulasi nopo nga hobi vinasi mantad id pangaan koonom, sundung tu kikapaasan om kipotutan izioho montok monongkiahi kumaa univositi ginumuan nopo nga miaga.
Mogiigizon, ka disido, au apatut mongintong do balajalan matrikulasi kivaa kohobuzan tu kivaa timpu dino, tangangazan susumikul pangaan konom hobi vinasi mantad susumikul matrikulasi.
Kogompit dino susumikul ngavi nokopupus SPM mositi nogi mongintong do balajalan pangaan koonom nga vookon pihi tavasi montok balajalan pra univositi.
Kumoduvo Huguan Montili minoboos, kosimbanon id suang sistom balajalan pangaan koonom nokotimpuun no toun diti mazaa sistom balajalan tohu semester nga id lahan pisuvazan susumikul matrikulasi nokopupus balajalan diho onom vuhan hobi sinikap.
Noudizo kokomoi dati balajalan pangaan koonom poniboon onom vuhan hobi osikap mooi piagahan miampai timpu balajalan id kolej matrikulasi, minoboos isido ahal dino soizukon do Komontilian Balajalan.
Muhyiddin di koniab pinougadan id Bali montok popotihombus kotombuhuzan onom tadau kumaa Indonesia mantad po di ko 3 Vuhan Kotuu nakatahib id suang popoinsavat pionitan pisokodungan duvo boogizan id suang mogisusuvai boogizan piahatan Malaysia om Indonesia.
Kumoduvo Huguan Montili nga minaganu kosivatan montok miboos miampai Naib Polosiden Indonesia Boediono kokomoi ahal ngavi duvo boogizan piahatan duuduvo pogun, hoohobi no kozo i kogompit miampai vinakas kalaja, kobohingkangan id uvang pivohitan maritim miampai kobohingkangan koubasanan mogiigizon.
|
