|
5th July, 2012
TAWAU: Songuhun kusai nopujulan kiniopon kahapas minaganu haang minintutud disido sondii id suang iso pagagavasan id iso stesen tumau id uvang diti, di Tadau Koduvo.
Huguan Pulis Tawau, ACP Ibrahim Chin minoboos, id suang kinantakan di jam ko 3.20 minsosodopon dino, i nogompitan id ponimpunan nosivatan minanampasi piipio pakakalaja om momognuo di tampat kinantakan, poguhui pinaatod id Hamin Pongusapan Tawau.
Sundung i do ingkaa ka disido, i nogompitan i pisosoomo kiumul 20an minidu pogun id hamin pongusapan dino om ontok diti boogizan pulis maamaso mongkimamaa mongintutun kointutunan, mantad no koozuzuvo tinan disido di noindamaan nohonuk.
“Asil pinomolisaan, noihaan do dokutul kivaa ogumu tinan id boogizan topos di nogompitan om otumbazaan tokou i nogompitan minonginum nogi do timau petrol poguhui minaganu haang minintutud,” ka disido.
Minokianu nogi i Ibrahim puu mogiigizon i natagakan do puu paganakan mooi do mikot id hamin pongusapan toi ko id balai pulis montok angkab pongintutunan tinan di nogompitan om tuduvan kiis diti kakal po soizukon.
Tumanud disido, kinantakan dino nopo nga kiis koduvo pinopoompit do ‘dumuso sondii’ id uvang diti id suang timpu apat tadau kahapas songuhun komuhakan kusai kiumul 17 toun tuminuun mantad taap louting id Sabindo, di ko 1 Vuhan Kotuu nakatahib.
“Ponginaman dumuso diti nogi tootopot nopo nga iso kahasaan id undang-undang. Saasabap no dino, humansan tokou puu mogiigizon kaanu manaak pongintangan kumaa ahal diti.”
“Nung kivaa tambahut ngavi toi ko puu paganakan dioho i dati nokotoguvang do akasou pomusaavan, onuai no izioho boos ngavi di kopongunsub om nung kiguno, pootodon izioho monoimo pongusapan toi ko kaunseling,” ka disido.
Id suang kiis koiso, komuhakan di tuminuun mantad kinavas kuang hobi 25 meter nosinduahan nopo om notipuan takod, kahapas naatu id savat bonet iso kulita id siibo louting dino.
Noihaan i nogompitan kakal monoimo pongusapan id Hamin Pongusapan Tawau.
|
