|
4th July, 2012
MARANG: Monuidong o Koupisan Bomba om Mananampasi Malaysia (JBPM) do unit tavan dino id Sabah om Sarawak do tosisikap montok popotimpuun kalaja panampasizan, hobi no id uvang sokid tu kivaa do kaantob montok popohuzung sakadai id dinda kumaa id kinoizonon di ikoton miampai osikap.
Minoboos i Huguan Potunud dino, Datuk Wan Mohd Nor Ibrahim do duuduvo pogun diho nopo nga momoguno kozo kotoinaan tavan tu hivang pias dino I kinuhu om ahaab om nogi obuihit do vazaan maza id dinda toi ko padau.
Poingkuo po ka disido, ahal diho kakaal id pamalanan tu kivaa tokuudi kaantob do boogizan disido montok mogium hivang om kinoizonon di kosudong montok panadaan om potubpoan do helicopter.
“Miampai kivaa diho unit tavan id Sabah om Sarawak, kopopulokis iho do kalaja manampasi om nogi manamong kotutudan om koponguhan koinsudon do puu bomba do manampasi, hobi no id uvang di tosodu.
“Mogiigizon do doiho tomoimo mokianu do boogizan bomba popoingkavas kotoinaan om kotumbozo tokou do mimang iho iso kopokionuan tumanud logistic di poinhaab, piahatan sinodu mantad iso kinoizonon kumaa id kinoizonon suvai, somoonu iho do kapasabap kobuhitan do boogizan disido maganu haang,” ka disido.
Noboos disido iti kuminaa doid magaganu abal di kahapas kinapataakan gaa toi pingat koupisan om tutungkap kotoinaan tavasi kozo do JBPM id Akademi Bomba om Mananampasi, Wakaf Tapai, di koniab.
Tumanud di Wan Mohd Nor, nung aantakan kotutudan pias id uvang Sokid id duvo pogun diti, asansagan o boogizan disido monkianu sakadai mantad Susumangod Tavas Diraja Malaysia (TUDM) montok papaatod puu dino do manamong kotutudan.
“Asansagan tokou do mokianu sakadai mantad TUDM tu aiso dotokou do kotoinaan tavan om nung kivaa kalaja suvai do TUDM, asansagan om boogizan dagai mogium pihi suvai,” ka disido.
Gisom baino diti, duvo no pogun kivaa unit tavan, iho nopo nga id Subang Jaya, Selangor om Bertam, Pulau Pinang, id nomboo iho do nogonop miampai iso helicopter om kikotoguvangan manamong kotutudan poingukab di aantakan.
Kihizab tokou nogi montok monuidong pomo’uangan unit tavan id Terengganu om Johor montok timpi tanau,” ka disido.
Naamot diho, minoboos i Wan Mohd Nor do mongumbangan o JBPM do timpu tuu minit montok maganu haang tumoguvang nunu noopo kaantakan taabpo toi ko koubakan sandad pogun di aantakan.
Ka disido, koimauan do JBPM montok mongingkudi timpu sisimba kumaa doid nunu noopo kaantakan nga kaanu popoingkudi koumbakan kotos bakaang, kaampai do koundunan kosinduahan toi ko kopujulan kiniopon do munggui.
|
