|
3rd July, 2012
KOTA KINABALU: Kivaa no 88 kiis do Hintuun Kakadazan Tagazo Kota Kinabalu (DBKK) i nahantoi pinosogku toi minaan fail id Kuut di toun 2011, pibagahon miampai 1,520 kiis di toun poguhui dino, ka di Mayor Kakadazan Tagazo Kota Kinabalu, Datuk Abidin Madingkir.
“Vookon factor di noihaan minonokodung kuminaa doid kinoinsiboon kozo diti nopo nga dati kogompit miampai komungkangan id proses kopotoundaan papafail dokumen id kuut,” ka disido.
Noboos di Abidin iti id pason disido di ontok pinopoimagon ‘Bengkel Ponoizukan om Pamadawahan DBKK’, id Hongkod Pambalajalan Kakadazan Tagazo, do doiti di koniab.
Ontok ponogi diho, kiis ngaavi DBKK nopo nga nabaagi kuminaa duvo, iho nopo nga Saman Sivil om Saman Koupisan. Kiis sivil nopo nga kiis di kogompit sukai au nabalazan kadaran (pintu) i kapangangkub 95 piatus mantad ginumu kiis i minaan fail tikid toun om hobi dino nopo nga gatang pinomohizan hamin au nabalazan om vohos kotos DBKK au nabalazan, ka disido.
Naamot do montok kiis saman koupisan ka disido, iho nopo nga kopogompit kahasaan toi kadaandang kopoobian undang-undang di kivaa poinsandad, miaga id siibo Undang-Undang Tonini Popotood Kulita 2003, Undang-Undang Tonini Anti Sizamut 1984 om Undang-Undang ToniniHinominon 1951.
Naamot diho, ‘Bengkel Ponoizukan om Pamadawahan DBKK’ diho nopo nga pinaanjul sohinaid apat tadau, tuminimpuun di koniab om numpazat do 70 upisol om pakakalaja DBKK.
Pinaanjul o bengkel diho montok popoingkavas po vahu kalatian om kahansanan id tatanga do puu DBKK i kogompit doid kopotoundaan Kalatas Ponoizukan om Kalatas Koponondosan, ka disido.
Suvai diho ka disido, kituduvan nogi iho do mooi o Upisol Mamadawa ngaavi do koiho om abaa kokomoi komozon di poinsuat om poinsuang id undang-undang nokomoi,” ka disido.
Id sampaping diho ka di Abidin, bengkel diti nga kituduvan nogi montok popoingkavas kopipiumanan om kalatian do mumumpazat ngaavi kumaa doid kopoobian undang-undang di kivaa poinsandad, miaga do Ordinan Kopolintaan Kinoizonon 1961, Enakmen Kakadazan Tagazo 1996 om Undang-Undang Tonini di pinokuasan do DBKK.
Potindapou nogi doid kinopomoiganan diho i Puu Kotinanan Mononontuduk DBKK, i sabaagi Poniikon Komiti Portfolio Kopokuasaan om Undang-Undang DBKK i Datuk Mariati Robert, Huugan Unit Pamadawahan Koupisan Luyal Pogun (Sabah) i Jamil Aripin om Kumoduvo Huguan Potunud Operasi DBKK i Joannes Solidau.
|
