|
3rd July, 2012
KAJANG: Manakadai o polinta RM27 lizong montok momogonop pambalazan poimbida kumaa bagas pakalaja kuntilik Koupisan Kobuuon Mogiigizon (Kemas) mantad po timpuunon toun diti.
Kumoduvo Montili Kobuuon Dahabus Kakadazan om Wilayah Datuk Hasan Malek minoboos mantad ginumu dino, kiginumu RM18 lizong ginuno montok pambalazan fasa koiso tumimpuun ko 3 Vuhan Kotohu nakatahib om kouangan RM9 lizong montok momogonop upalai ko’uangan.
“Nokotoimo o komontilian kiginumu 3,000 upalai ko’uangan. Ahansan sakadai diti kabaagi id timpu tosikap ahapas kaanu kasagaan Komontilian Kousinan,” ka disido kuminaa magaganu abal kahapas tuminindapou do lamai Buuan Miampai Layat id Sungai Lui, Dusun Tua, id doiti di koniab.
Kopoihaan pambalazan poimbida RM3,000 songuhun id lahan ‘one-off’ dino tinoodo Huguan Montili Datuk Seri Najib Tun Razak ontok pinapahabus do Belanjawan 2012 toun nakatahib.
Pambalai poimbida dino kipotutan upalazon do bagas pakalaja kuntilik i nakakalaja kihinaid do himo toun toi ko hobi om au insan koontok do nuununu haang disiplin do Kemas.
“Pogun Selangor nokoponuat mononoimo di takavas montok balazan fasa koiso ino nopo nga kiginumu 786 tuhun i pinopoompit pomogizan usin kiginumu RM2.36 lizong,” ka di Hasan.
Id lamai dino, pinopoboos nogi i Hasan piipio sakadai kaampai no RM100,000 montok popoinsavat ningkokoton sunsuzon papan id Kampung Orang Asli Paya Lebar id doiti kuminaa koupisan konkrit.
Suvai mantad dino, ka disido talun alun 1.5 km id Kampung Orang Asli Kachau Dalam nga nosiil miampai balanja kiginumu RM190,000.
Pinopotunui nogi i Hasan suat kasagaan Projik Abaabazan Sakadai Hamin 2012 montok mogiigizon Kampung Batu 21, Sungai Lui miampai cek kigatang RM1.05 lizong mantad Boogizan Kikuasa Kobuuon Momutanom Toniini Pomounan Getah (Risda) montok mambalai pananaman mahik getah montok momutanom toniini id kampung dino.
|
