|
|
|
Rowell (tanga) miampai di Fadzil (gibang) om Sharanjeit pinopokito do balang nga nasamaanan ontok pitimbungakan abal.
|
3rd July, 2012
SANDAKAN: Huguan Pulis Uvang otumbazaan do nokoponguhan tohu kinantakan manakau magaau id id kadai dumagang 24 jam mantad no kinagakaman puu ngavi dino songuhun pakalaja polinta miampai duvo tambahut disido mantad Johor di Tadau Minggu.
Tinimungan puu pulis Uvang Boogizan Koponoizukan Kahasaan Tavagat, mantad Bandar Kim Fung om Sibuga nakapanaan di natandasan i moniva id hamin Apartment Villa Permai id Sibuga di kuang hobi jam ko 1.30 minsusuvab ontok di ko 1 Vuhan Kotuu mantad no kopoihaan di notoimo, ka di OCPD ACP. Rowel Marong ontok pitimbungakan abal, di koniab.
“I natandasan dino kiumul 18 om 26 toun om mantad Johor,” ka disido.
Tumanud di Rowell, otumbazaan o pulis nakaanu izioho minonguhan kiis manakau id kadai 24 jam poingukab (duvo id Bandar Utama om iso id Bandar Indah) i timpu di tosikap i nantakan ontok di ko 23 Vuhan Koonom, 24 Vuhan Koonom om 27 Vuhan Koonom om minanakau id padadangan tolifaun piovit-ovit id Bandar Tyng piahatan jam ko 1minsosodopon ontok di ko 2 Vuhan Koonom gisom jam ko 8.30 minsusuvab ontok di ko 3 Vuhan Koonom om pinoguntaban kinolugian kuanghobi RM15,000.
“Soizukon dagai nung i nantandasan kitonggungan kumaa piipio vagu kiis id uvang diti om id pogun sungkad tukad, mongintong kumaa timpu nakatahib duvo komuhakan aiso kalaja dino, “ ka di Rowell.
Ka disido, tinimungan pulis nga nakapagaau 68 kavo balang mantad di natandasan id nizonon.
Minoboos i Rowell monoizuk o pulis kiis diti tumanud Section 457, Section 395/397 panel code.
“Pinapanau dagai o pinonoizukan poimbida kumaa di natandasan kahapas nakaanu luputan kinantakan om nakahantoi minanaan di natandasan id timpu duvo minggu,” ka disido.
Minoboos i Rowell tohu di natandasan tinaan naamot kihinaid tuu tadau montok koponoizukan do pulis. Monongkotohuod nogi isido kumaa tuhun ginumuan i minanaak sokodung gisom nakagakom om monuu isido tuhun ginumuan i kivaa kopoihaan kokomoi abaabazan kahasaan tavagat id uvang diti do poposikap manaak kopoihaan kumaa pulis.
Nokotindapou nogi id pitimbungakan abal id Hongkod Upis Uvang Deputi OCPD SUPT. Fadzil Mohd Ali om Upisol Takavas Koponoizukan ASP Sharanjeit Singh.
|
