|
24th June, 2012
MELAKA: Huguan Montili Datuk Seri Najib Tun Razak minoboos kosimbanan i tinoodo do polinta Barisan Nasional (BN) mantad po tohu toun nakatahib tumimpuun opiumanan layat Malaysia.
Minoboos isido dandi ngavi polinta BN id suang popobuu pogun miampai monuhung do layat nakahantoi do minonuhuk mazaa mogisusuvai abaabazan di tinoodo id suang timpu dino.
“Id suang timpu tohu toun diti nopo moboos o tuhun kosimbanon tootopot nantakan no… kosimbanan di opiumanan kozo do layat. Ondomon nopo nung tokou kivaa himo po toun vagu pointantu no do ogumu vagu kosimbanon i todoon dotokou saasabap no dino kotumbazaai no tokou (BN) dandi, dandi di tuhukon,” ka disido ontok minamason id lamai kopomoiganan UTC Melaka om Jelanja Janji Ditepati id talun alun Hang Tuah id doiti, di koniab.
Nokotindapou nogi savo huguan montili Datin Seri Rosmah Mansor, Vozoon Montili Melaka Datuk Seri Mohd Ali Rustam, Montili Kousinan Koduvo Datuk Seri Ahmad Husni Hanadzlah om Montili Kobuuon Dahabus Kakadazan om Wilayah Datuk Seri Mohd Shafie Apdal.
Minoboos i Najib kapanadaan abaabazan kaampai no Sakadai Layat 1Malaysia (BR1M), Pomuhominan Layat 1Malaysia (PR1MA), Klinik 1Malaysia miampai Hongkod Kosimbanan Kakadazan (UTC) om Dahabus Kakadazan (RTC) pinopokito do polinta nakahantoi minonoodo saviavi i nouhud.
“Tokou mositi kivaa tangangazan intelek montok momusoou toihaan ngavi kavavagu saasabap no do id suang abad ko-21 diti isai nopo i kivaa toihaan hobi vinakas, hobi poinsosoguhu isido no i kaanu sokodung mantad layat, mantad dino tokou kivaa toihaan monuhung layat okon nopo monoodo tokou do BR1M, PR1MA, kivaa nogi toihaan dotokou mooi id tanga kakadazan diti monoodo tokou kosimbanan kakadazan,” ka disido.
Id sambahik dino, minoboos i Najib boogizan gugumaga i pinapatazad dandi di togumu au nakahantoi minonuhuk dino gisom nontodonon do layat hoohobi no kozo id pogun di kinuasa dioho id suang kobohingkangan.
“Au tokou kaanu momoguno tuhun di mamadandi au kotuhuk, tuhun di momoduung… tokou sabaagi do iso polinta mositi monuhuk ngavi do dandi dotokou,” ka disido.
Naamot dino minoboos i Najib mangatag o polinta monoodo PR1MA id pogun Melaka i kaanu nodii layat pogun diti momohi hamin miampai gatang 20 gisom 30 piatus hobi omuula piagahon gatang kapadagangan.
|
