|
22nd June, 2012
KUALA LUMPUR: Tampat pakalajaan mositi momoguno do kotoinaan upisol koumohigan montok kalaja papaatod usin, ka di Kumoduvo Montili Sandad Vinanas Datuk Maznah Mazlan.
Minoboos i Maznah, pakalajaan mositi momoguno kotoinaan upisol koumohigan kisandata om nohuda montok modihin kantakan aavan ontok monoodo kopoundohian usin.
“Tampat pakalajaan nga au apatut popovihiu tonggungan (papaatod usin kumaa upis) kumaa pakalaja toomod…,” ka disido kuminaa magaganu abal kahapas pitimbungakan media id Hamin Pongusapan Kuala Lumpur (HKL), id doiti di koniab.
Nokosoguhu Maznah tuminombuhui om pinopotunui cek au natagakan tangangazan kuminaa di Haffiz Zamri, Jurutol i nogompitan na’aavan kisandata.
Mohd Haffiz, 26, nokopupus papanau pamazazakan momutu takod vanan disido id HKL Tadau Kohimo nakatahib.
Ontok Tadau Kaapat nakatahib, Mohd Haffiz om tambahut disido Nurijah Rosli, 24, duuduvo dioho dino jurutol Projik Talun alun Utara Selatan (PLUS), nosinduahan kahapas binadi poguhui na’aavan RM2,000 do iso tinimngan magagaau, ontok id suang pamanaan papaatod usin nopuu tol kumaa upis komponi dino id Plaza Tol Seremban.
Naamot dino, Maznah i nogi Ponikoon Kounsol Pogun montok Koumohigan om Kohidasan Pakalaja minoboos, lamai dino mitimbungak ontok ko 2 Vuhan Kotuu montok miboos gais pongihaan papaatod usin kumaa bank i mositi do tonudong tampat pakalajaan.
“Iso gais pongihaan todoon montok papatantu kootulan kalaja standard (SOP) kopoundohian usin nopuu i mositi tonudon tampat pakalajaan pogun diti montok modihin aavan,” ka disido.
|
