|
|
|
Nagamu… dadah kavo syabu i nahantoi minamagamu.
|
22nd June, 2012
LAHAD DATU: Koupisan Koponoizukan Kahasaan Tavagat Narkotik (JSJN) uvang diti nakahantoi minanaan kiginumu do 14 tuhun kusai om duvo koonduan tuhun songkosuvazan id mogisusuvai kahasaan kaampai no kikotumbazaan kivaa om nokogomit id suang abaabazan humasa momoguno dadan miampai do aiso suat kointutunan ontok pinopoimagon do Ops Dadah id doiti, di Tadau Koonom.
Nagamu nogi id suang kalaja dino dadah kavo syaby kivinagat do 46.23 gram miampai gatang pisosoomo RM19,000 mazaa duvo pinonugkuan misuvai i tinoodo.
Ponovohi Huguan Pulis Uvang Lahad Datu, ASP Bong Kuet Khiun minoboos, minaganu haang mantad kopoihaan om ponohinuan di kuang hobi jam ko 12.05 pitanga sodop, iso tinimungan JSJN miampai tohu upisol i hinuguan di Insp. Mohd Noor Ariffin minonoodo pinonugkuan koiso id pomutanaman piasau mamau om nakahantoi minanaan apat kusai, duvo mantad dino tuhun songkosuvazan.
Ka disido, ontok pinonugkuan tinoodo kaapat-apat kusai dino i kiumul piahatan 20 gisom 30 toun nokito do aadsai monizob dadah miampai monoodo abaabazan pamahapatan dadah id iso husap toniini id uvang dino.
“Id suang pinonugkuan dino, JSJN nakagamu 46.02 gram dadah kavo syabu i pinoopi id suang iso kutak plastic otomou,” ka disido.
Minoboos i Bong saviavi di natandasan dino taanon naamot om kiis dino soizukon tumanud Seksyen 39A (2) Akta Dadah Kohigaganan 1952.
Naamot dino id suang iso pinonugkuan koduvo i tinoodo misuvai di kuanghobi jam ko 1.30 minsusuvab id Kampung Bagingod Felda Sahabat, pinopoiho i Bong boogizan JSJN nga nakahantoi minagaau dadah noihaan kavo syabu kivinagat do 0.21 gram om minanaan songuhun kusai tuhun songkosuvazan kiumul 21 toun.
Ka disido, ontok pinonugkuan tinoodo i natandasan ontok ponimpunan dino kuminam mogidu kahapas nokopiuman koikatan boogizan pulis miampai pinapataam iso hopot id dahabus hamin.
“I natandasan nahantoi minanaan kahapas dino, pinolisa miampai do hinapatan dino om noihaan do kutak kingaan do L.A dino kivaa 2 hopot plastic toniting kisuang syabu,” ka disido.
Ka vagu disido, izioho i nagakom om balang ngavi dino noovit mahik id balai pulis uvang Lahad Datu montok koponoizukan om haang sumusuut.
Tumanud vagu disido, pinonoizukan kumaa kusai dino nga noihaan magaganu dadah kavo Methamphetamine songian pinoniisan sobu pinapanau kumaa disido.
“I natandasan nga soizukon tumanud Seksyen 15(1)(a) Akta Dadah Kohigaganan 1952,” ka vagu disido.
Montok, id suang piipio kalaja i pinapanau di totuvong dino, boogizan pulis nga nakahantoi minanaan kiginumu do 8 tuhun kusai tuhun songkosuvazan kiumul piahatan 15 gisom 35 toun, kahapas pinoniisan sobu i tinoodo kumaa saviavi di natandasan noihaan izioho magaganu dadah kavo methamphetamine.
Ka di Bong, tinaan nogi songuhun kusai miampai duvo koonduan tuhun songkosuvazan, ontok pinomolisaan saviavi di natandasan au nakahantoi pinopokito do nuununu suat kointutunan.
“Vahu di natandasan dino nga soizukon tumanud Seksyen di miaga 15(1)(a) Akta Dadah Kohigaganan 1952 montok tohu vagu tuhun songkosuvazan nokogompit pinataak kumaa Koupisan Imigresen Uvang Lahad Datu montok haang sumusuut,” ka disido.
|
