|
|
|
Azizah minonuntung tagung tanda kopomoiganan do seminar nokomoi.
|
22nd June, 2012
TAWAU: Kantakan papataam tanak i noindamaan nokoinsavat miampai lahan hobi osiou om au kosuang id pomusaavan tanda mogiigizon pogun diti nokotoguvang kobohingkangan noumbakan kotundunan di noindadamaan.
Montili kotundaan Mogiigizon om Ahal Momoguno Sabah, Datuk azizah Mohd Dun pinopoiho do kogumuan kantakan papataam tanak diti asil nokohombus mantad piombohutan aiso kaantaban tinimungan komuhakan.
Ka disido, nung di poguhui kiis kosoomo tanak id tuung sazamut no, palit, mosogit om baino diti hobi katama om aiso kosianan.
“Kivaa di kaakun papataam tanak mantad louting savat om di hobi kosinduo ginavo songian sosonguhun susumikul mogosusu id sikul om poposuang tanak di kosusu id kantung sikul,” ka disido.
Minoboos isido dino ontok minamason id lamai kopomoiganan seminar Sebening Kasih, Sejuta Harapan, Melestari Keluarga Bahagia naazu miampai Univositi Institut Teknologi Mara (UiTM) id Dewan Datuk Lau Gek Poh id doiti.
Tumanud disido, pinoguntaban Koupisan Mogiigizon nokoponuat posoihi tohu tanak pataamon potitikid minggu id pogun diti poompus toun 2007 gisom Vuhan Kaapat 2010 om kogumuan misosonguhun di nokogompit id suang piahatan umul 18 gisom 25 toun.
Ka disido, pinoguntaban di pinahabus Koupisan Kopolijistahan Pogun (JPN) montok toun 2000 gisom 2008 nga nokoponuat kiginumu 257,000 tanak pinolijisto aiso ngaan mohoing kusai.
Montok pinotungaban Pulis Diraja Malaysia (PDRM) nga pinopokito kinoinsavatan kiis papataam tanak ino nopo nga 396 kiis nosuat mantad toun 2005 gisom 2011.
“Koozuzuvo diti kotongob kozo om mokianu pisokodungan saviavi boogizan montok manahob kantakan diti mantad tuutulus kalalad om au tokou mimang koozuzuvo di nantakan id kotonobon nga otoguvang pogun dotokou,” ka disido.
Tumanud disido, id pogun ngavi kotonbon kobohingkangan kahasaan tavagat om kantakan social oindadamaan kozo ontodonon do kotundaan om kobuuon di naanu au aadang.
Naamot dino minonugut kokomoi abaabazan dino, minoboos i Azizah ino pinopokito do kosianan om pilotian saviavi boogizan papanau pongkimamaan popoimbuhai mogiigizon di kbuu kopitanud miampai sistom om gatang paganakan di tapantod.
Ka disido, pinantod institusi paganakan nadadi kokitanan kumaa pinantod mogiigizon om pogun saviavi dino tu institusi paganakan koponuidong mogiigizon di tuutulus kapatantu ikoton pogun.
Nokotindapou nogi id abaabazan dino, Ponikoon Kounsol Monontuduk Koonduan Sabah, Datuk Mariati Robert.
|
