|
21st June, 2012
KOTA MARUDU: Koisaan Tanak Mamasok Pogun Sabah (Pansa) toriirimo minggisom monguhup di tongo’ puru dau loolobi no mogiigiyon id labus kakadayan miagal doid Kampung Pampang Poring, kiikiro 25 kilometer mantad hiti do monginsonong gontob kopooposion.
Minoboros id pinirubaan miampai mogiigiyon kampung dilo’ di kaawagu diti, i Porosidin Pansa Peter Gibin minanahak jominan do mogowit kobolingkahangan potoguang mogigiigiyon kampung nokomoi kosuul no i kopogompit do talun-alun kumaa bohogian kitonggungan.
Minomuruan isio do kinotombuluyan Pansa doid Kampung Pampang Poring i natanud po nogi’ di Luguan Biro Pansa Kota Marudu i Ahzveens Akian, Luguan Piromutan Pansa Kampung Soronsob Unggak Modiu om piipiro puru komitikuaa’ Pansa Longkod.
Pansa do babaino’ diti pasanganu kiikiro 6,000 puru id poliliput pogun.
Pinosotol di Peter do ralan nopo di osonong kosili intodonon kumaa kopotundaan toisoiso’ kampung om potilombus dino kopoburu’ ikonomi mogiigiyon.
“Hinombo nopo koiyonon, amu’ monimud do osomok toi osodu’, kopongowitan do kopotundaan aanu popoindalan soira’ do osonong o ralan,” ka disio i minongunsub po nogi’ do lalansanon kinoiyonon om koporintaan maganu laang poinpatut monoibau kobolingkahangan dilo’.
Miampai sinodu’ kiikiro no do 25 kilometer mantad kakadayan doodoros, Kota Marudu, timpu di gunoon momoguno padsakaian 4WD kumaa kampung dilo’ sumigampot do tolu jaam pamanahan nosusuhut koyuon ralan di araat.
“Kopotongob kopio soira’ kokito do konosipan wookon tanak mamasok pogun Sabah i kakal doid taang laid sundung id posoosorili’ diolo’ ogumu’ no kinotundaon di naramit pointonod do nokomordika’ pogun lobi 50 toun di nakatalib,” ka disio.
Potilombus dino, minongunsub isio di tongo’ mogiigiyon kampung do maganu laang posogulu miampai mongusaha’ do tana’ tungkusan diolo’ silihon do kabun.
“Kasaga’ do mongukab tana’ sokookoro’ do limo ikar songulun montok pananaman do piasau sawit id koponimpuunan,” ka disio.
Kohondot do koponguhupan kumaa mogiigiyon do mongusaha’ tana’ diolo’, ka di Peter pinggisaman do Pansa monguhup id koposodiaan do bibit om karaja’ sokodung di suai kopiongoi di kogoosan do koisaan dilo’.
Kopongunsuban di miagal, pinoboros po nogi’ disio kumaa mogiigiyon i orohian popotunda’ tana’ diolo’ maya’ pananaman gata’.
Minamason nogi’ isio do tongo’ molohing ngaawi’ do amu’ popoindisan kosuulon balajaran tangaanak diolo’ om pinoposotol do kalantaion tangaanak id palarajan koposimban do gontob koposion diolo’.
Pinosotol po nogi’ di Peter do ikonomi tanak mamasok pogun kiguno inggirotan mooi do kotopong di tongo’ mogiigiyon tinaru suai id pogun diti om palajaran nopo nga’ posunduran do komogoton dilo’.
“Kobolingkahangan kokomoi balanja’ okon nodi ko’ padaahan popoindisan do palajaran tanak. Koporintaan nga’ ogumu’ koponguhupan id koposodiaan balajaran poinggonop kumaa rayat,” ka disio.
Naamot dilo’, i Ahzveens ontok minongomi kinotombuluyan Pansa id kampung nokomoi minoboros do ilo’ nopo nga’ laang ‘turun padang’ do Pansa posusuhut di kinapatahakan toluod mantad Pansa kumaa mogigiiyon do hilo’ di pogulu diti.
Wookon nopo, Pansa maya’ di Luguan Biro Pansa Kota Marudu pinopotoluod do songinan ginoritor, zink om kakamot kagaaganapan ropuhan montok kogunaan mogiigiyon.
Nosusuhut di upalai mogiigiyon montok kopokionuan set tuunion gunoon id sasambayangan do hilo’, pinahabar do Pansa kapatahakan toluod nokomoi ontok Tadau Paganakan Pansa nayatan Kota Marudu, i pohoroon do suab doid Lintuhun Mogiigiyon Kota Marudu.
|
