|
20th June, 2012
TUARAN: Tutumombului id kakadayan Tuaran mokiinsian kumaa bohogian kikuasa kosuul mantad Polis Diraja Malaysia (PDRM) montok manahak koluhauan kumaa mogigiyon nokoiyonon id ahal popoili padsakaiyan lolobi ontok Tomu Minggu id Tuaran.
Tumanud intonodon, id koubasanan ontok Tomu Minggu doid kakadayan Tuaran asasaru do noponu di tongo mogigiyon mantad pososorili watas Tuaran, Tamparuli suai mantad tongo tutumombului om modidikot suai.
Suai mantad dilo, tadau Minggu sitopot nga timpu montok mogigiyon kiugama Kristian Katolik do sumambayang doid gereja St. John Tuaran, id hombo poinsumpak id dodoros watas tomu nokomoi.
Montok dilo, kobolingkahangan koiso i asaru do polombuson di tongo mogigiyon hiti nopo nga ahal kokurion watas pomokingan kurita.
Kokito di ahal diti, pipiro mogigiyon mantad watas dilo pinopolombus kopomusarahan diolo om mokiinsian kuma bohogian poinggompit montok mogowit ahal dilo montok pogintangan.
Roger, 41 toun, mantad Tamparuli kipomusarahan do bohogian kikuasa sapatut manahak koluhauan tokuri kumaa mogigiyon nokoiyonon lolobi ontok Tomu Minggu.
Ka disio, sabap no do orosian do samanon, asansagan isio do mindad id suang kurita naamot di sawo dau i mogontian luminabus moi pomoboli tongo rapaon om kakamot dopuhan doid tomu dilo.
Naamot dilo, i James, 38 toun, asansagan do pinopoili di padsakaiyan disio id pomokingan tosodu mantad watas tomu dilo sabap no do orosian samanon bohogian kikuasa.
Id iso kiis miagal, songulun tutumombului, i Jevry Anggah, 37 toun mantad Taman Telipok Square minoboros di kawawagu diti, onotk tadau Minggu, nakaanu isio saman mantad pulis sabap pinopoili kurita disio id bahu ralan ontok minongoi pomoli sada id tomu.
“15 minit oku no minamaking kurita ku doid Jalan Datuk Dusing, Tuaran di tadau Minggu nakatalib nga okito ku haro no saman poinsisip di soromin kurita.
Montok dilo, mongomoi isio di koburuon bohogian pulis trafik i manaman aiso koluhauan kumaa diolo sabaagi tutumombului dilo sabaagi amu relevan.
“Sapatut da, ontok nopo Tomu Minggu i oilaan tulun do asasaru do oponu padsakaiyan toi ko tulun mogigiyon dilo, kaanu no da yolo manahak kosiwatan,” ka disio.
Tumanud disio, sabap do osusah tomod mogihum parking, asansagan isio di do minamaking id liha ralan dilo montok momoli sada id tomu.
Id pomusarahan disio, bohogian kikuasa kaanu do monimbang koyuon dilo, nga totopot pinomusarahan dilo amu nokointopot.
Montok dilo, alansan isio ahal miagal diti kaanu do tahakon iso pongintangan di totopot sabap watas Tuaran nointutunan ginumuan maimpai Tomu Minggu om koyuon bohogian diolo i ogorot tomod manaman dilo amu koposontob tulun do tumombului doid Tomu sabap orosian do samanon.
“Mokiinsian yahai kumaa bohogian Kounsol Watas Tuaran do popotimbang montok popogumu lot-lot parking id kakadayan Tuaran montok popoinsanang koinsanai mogigiyon,” ka di Jevry.
|
