|
19th June, 2012
KUALA LUMPUR: Kaganaan kabaahan toi ‘profesionalisme’ kopongia’an om angkab rayat kohondot sistom balajaran nogi’ kosilihon susumikul nosili buntukon poinbida’ i kiguno onuan kopomodulianan id pinggisaman koposimbanan (mentransformasi) palajaran pogun, ka di Kumoduo Luguan Montiri Tan Sri Muhyiddin Yassin.
I Muhyiddin, i po nogi’ Montiri Palajaran minoboros do ilo’ nopo nga’ i naanu-aanu tosopung mantad walu’ bohogian Pinibarasan (Dialog) Nasional Pendidikan i kopogompit do 8,415 tulun mantad mogisusuai nayatan mogiigiyon om koyuon do palajaran kaampai no mongongobi’ mantad kaganaan kougamaan i pinoindalan gisom do babaino’ diti.
Minoboros isio do kakal haro limo po bohogian pibarasan i kapanau gisom piintangaan wulan diti i kituduan maganu kointalangan nogi’ pomuasrahan mogiigiyon montok poposodia’ rikoton palajaran di lobi kosonong do timpu dumontol.
“Mantad dilo’, pokionuon ku toinsanan bohogian mooi do karamit koundaran kosiwatan i kakal do haro diti montok mogisokodung manahak kopointalangan om pomusarahan montok timpu dumontol sistom palajaran pogun,” ka disio ontok minonimbar ponguhatan di Teng Boon Soon (BN-Tebrau) id pitimbungakan Dewan Rayat di konihab.
Minokianu i Teng di Montiri Palajaran popointalang rikoton toi koongoiyon di wagu do Komontirian Palajaran id pinggisaman poposimban do Nimpohon (Dasar) Palajaran Negara.
Minoboros i Muhyiddin do turu’ pinibarasan mija’ ourug kopogompit tinimungan kibuntukon om kikoundaran id sistom palajaran nokoindalan potimpuun di tulan Kaapat notoliban om kakal do haro po walu’ o pibarasan montok pongohon.
Ka disio, ahal di nulingad di maso pinibarasan kogumuan dilo’ karait do ponguhatan somok mogiirad miagal di pinogibarasan id bohogian pibarasan nasional ilo’ nopo nga’ gontob do naangayan mongiingia’, kurikulum om kopogintangan, sinonong sikul, kopomuruanan sikul, koposotolan kumaa di pogoyuon om disiplin susumikul, kogompitan molohing nogi’ palajaran i posimbayan mantad kosopulan pulitik.
Minoboros isio do ahal i nosili tulu kororohian id walu’ pinogibabarasan om turu’ pinibarasan mija’ ourug dilo’ nopo gna’ 27 pihatus di ‘responden’ kokomoi do kabaahan kopongia’an, kotundunan om komilaan kopongia’an mongiingia’.
Sunduk suai nopo ka disio nga’ angkab sistom palaajran om kopotundaan tulun posunduran (modal insan) di lobi poinpuli (14 pihatus), sinonong sikul (12 pihatus), kopomuruanan sikul (11 pihatus), kurikulum om pentaksiran (10 pihatus), tonggungan molohing, mogiigiyon om siktor poriwit (siam pihatus).
“Suai ko ilo’, suang om kogoosan sistom kapatahakan (turu’ pihatus), kopulokisan om waya’ pomogunaan intodonon (limo pihatus), ‘profesiensi’ mogisusuai boros (tolu pihatus) om kosiwatan nongkopupus mananga’ (iso’ pihatus,” ka disio.
Pinopolombus nogi’ i Muhyiddin do koponongkounsikahan kumaa kotinanan, koisaan, tinimungan mogigiyon om kotinanan okon doun koporintaan i pinapaatod do 22 ‘memorandum’ kisuang do pomusarahan, katatapan om atag id pinggisaman kumaa koponginsonongan sistom palajaran pogun.
Soira’ koinsanai kointalangan otimung om ointangan nogi’ oulud, ruputan tohuri maan posodiao’ om kosili kointalangan id kopotontuan rikoton palajaran di wagu toi palan laang palajaran, ka disio.
Minoboros isio do palan laang dilo’ maan pawalado’ kawagu kumaa rayat id timpu di poilaan do tohuri montok maganu sisimbar tohuri mogiigiyon i talib dilo’ pawaladon kumaa Kabinet montok kopolulusan.
Lumansan i Muhyiddin do ruputan rikoton palajaran di kiwaya’ om opogiupakatan dilo’ aanu monigampot iso’ sistom palajaran di osonong nogi’ kopomonu’ do kalansanan om angkab rayat.
|
