|
18th June, 2012
SANDAKAN: Kelab ‘Smiling Soul’, songinan kelab wagu do Kolej MARA, Banting aparagat popoindalan ababayan doun mogiigiyon.
Rikoton poinbida’ nopo do kelab i nosompuru di 30 tulun puru dilo’ nga’ monguhup monginggaan tonggungan di amu’ songkuro kikosukupan.
Koponguhupan di patahakon diolo’ nopo nga’ okon nopo ko’ id kagaganapan nga nogi’ id kopongunsuban, kopontudukan om pambalajaran kumaa di susumikul om i poinggompit.
Kolej dilo’, poposotol om mongunsub tongo’ susumikul umampai id ababayan doun mogiigiyon mooi do ounsub yolo’ do momogompi’ sandad posorili’ suai ko’ opoduli ‘do ginumuan.
Smiling Soul, sinakadai poinponu’ do tongo’ puru kelab maya’ yuran potitikid wulan, kapadagangan nogi’ koponimungan kousinan om mumbal po nogi yolo’ do mokianu sakadai mantad komponi suai panampung kos popoindalan projik papanahon diolo’.
Di kaawagu diti, kelab dilo’ minonilombus ababayan koponguhupan tulun om minomili’ kawagu do Kampung Pulau Berhala doros kakadayan Sandakan, pointonod di ko 10 gisom ko 14tw Ko’onom.
Tumanud di Porosidin kelab dilo’ i Muhammad Rusdi Md. Nor, kinopomilian diolo’ do kampung nokomoi sabaagi pinonusuhut ababayan di nokoindalan pogulu diti.
“Noilaan po nogi’ dahai do mogiigiyon id pulou diti mosikin suai ko’ potoguang kobolingkahangan padsakaian om piromutan.
“Ilo’ no sabab kinopomilian dahai do koiyonon dilo’,” ka disio kuminaa New Sabah Times di maso rinubaan id Ababayan Pitongkiadan miampai di sontinimungan susumikul Kolej MARA Banting i pinaanjur do Umno Bohogian Sandakan doid Medan Selera Tun Razak id kakadayan diti.
Pinointalang di Muhammad Rusdi do sundung amu’ yolo’ kopongobi’ koinsanai kobolingkahangan potoguang mogiigiyon pulou dilo’ miagal do pangaba’ waig om lotirik, nga’ kinorikatan diolo’ sokuukuri’ do kapanahak pongunsuban kumaa di tangaanak do hilo’ doid palajaran.
“Yahai no om nokopinsingilo di koubasanan do mogiigiyon pulou dilo’,” ka di Muhammad Rusdi mantad Kedah, i kiumur nogi’ do 19 om minaganu kaganaan Pongubatan id kolej nokomoi.
Id ababayan dilo’, ka disio minonuridong yolo’ do songinan longkod pambasaan buuk tokoro’ om pinopotoluod do tongo’ buuk basaon.
“Kalansanan do laang dahai dilo’ kopongunsub di tangaank id pulou diti do minggisom balajar montok monimban konosipan paganakan diolo’,” ka disio i minonongkounsikou kumaa koinsanai i nokogompit minonokodung diolo’ doid ababayan nokomoi.
Id projik dilo’, tinanud yolo’ di mongiingia’ i Mazlina Muhammad om i Fadzlanor Abdullah, om i Umi Aqilah Amir minonguhup di Muhammad Rusdi sabaagi Potunud Projik.
Naamot dino, songulun susumikul kolej dilo’ i Mohd Firdaus Abd. Rashid, ounsikou isio nakatanud do ababayan nokomoi.
Ahal di amu’ dau olihuan ka di Mohd Firdaus, nokoponguhup di tongo’ tangaanak mogiigiyon Pulau Berhala doid ababayan 4M (Mambasa’, Monurat, Mongintob, Monorisid).
Songulun kawagu susuikul i Julia Amira Muhammad Jais, pinopoilo do ounsikou yau nakaampai id ababayan dilo’ i poposotol po nogi’ do kopurimanan kokomoi koposion olidas doid mogiigiyon.
Susumikul suai i Hafiz Aizuddin Mohd Hazani, pinopoilo do ogumu’ nawaawaya’an wagu i naanu dau maya’ ababayan dilo’.
Naamot dino i Molohingon Kampung Pulau Berhala i Rawi Masud, minonongkounsikou kumaa do kolej om kelab dilo’ i minomili’ do kampung diolo’.
“Kinotombuluyan diolo’ do hiti nakapanahak do sunduan wagu kumaa mogiigiyon nokoiyonon,” ka disio.
|
