|
18th June, 2012
TAMBUNAN: Ponuidongan do Kolej KDM id uvang diti nopo nga kointahangan di popokito pinusou do Kopolintaan Barisan Nasional (BN) kumaa savi avi tinau id pomogunan Malaysia diti, hobi no id Sabah.
Minoboos i Vozoon Montili Sabah, Datuk Seri Musa Haji Aman do pointahang iti do popokito kopomuu’anan do BN i buu’anon di Huguan Montili Datuk Seri Mohd Najib Tun Abdul Razak, i opusou kumaa layat.
Ka disido, Kolej KDM i ukabon id uvang diti nopo nga okon noopo ko Tambunan nga manaak nogi iho kounalan kumaa uvang Sokid i kapaangkub do Keningau, Tenom om Nabawan om nogi id Sabah do songovian diho.
“Iti no lahan do BN popobuu do layat miampai au mongiho kotulunan, tinau om kotumbazaan,” ka disido di ontok pinopohombus pason kopiondot Abaabazan Miampai Layat om Mamabak Tana Kolej KDM Tambunan di pinoimagon di Huguan Montili Datuk Seri Najib Tun Razak id Pisompuruan Square, do doiti di koniab.
Minoboos i Musa do suvai ko Kolej KDM, ogumu po vagu kotundaan montok layat do pinaanjul maza kopomuu’anan Buuan Numbul Koiso Pomogunan diti (Najib) mantad di pongigit kalaja sabaagi Huguan Montili.
“Mositi monongkotohuod o layat kumaa do buuan di minomusoou togumu montok popoingkavas koonuan om ningkokoton koposizon do layat miaga do Huguan Montili i koupusan dotokou om pantangon,” ka disido.
Minoboos isido do kumalaja dounganavau om sodop i Huguan Montili montok popobuu do layat om sundung tu atangkangau miampai ponoinaan ngaavi ponguhudan pomogunan diti nga koundun nogi monginsomok do layat id potitikid pisuk id pomogunan Malaysia diti, kaampai no id Sabah.
Mantad diho ka disido, ada kaahung o layat miampai boos ngaavi do gugumaga i popoduntak boos kaka kumaa kopolintaan di popoboos do kopolintaan BN au nakaanu minonunda do layat id Sabah.
Ka di Musa, opusou o kopolintaan BN kumaa do layat om minanaak o Kopolintaan Pisompuuvan do kotundaan togumu kuminaa layat.
Tu iti nopo ka disido, kuasa di kivaa gunoon montok manaak kotundaan om sakadai kumaa layat, kaampai no Sakadai Layat 1Malaysia (BR1M), sakadai kumaa susumikul om baucer buuk kumaa susumikul IPTS/IPTS.
|
