|
14th June, 2012
PAPAR: Kotonudan ginumuan komulakan id koonjuran iso-iso ababayan alapon koporintaan id kokitanan do babaino diti nokoinggumu komulakan i nakatanud doid koimbayatan di amu olidas.
I Panakadai Montiri Koporintaan Nokoiyonon Om Kopomuwalaiyon Sabah i Datuk Ghulam Haidar Khan Bahadar minoboros do kotonudan ginumuan komulakan doid nunu-nunu ababayan i poonjuron sokodungon do porinta.
“Sabap do timpu diti okito no dati o koimbayatan sosiol i nakadadala minaampawong di tongo komulakan tokou, om koyuon diti sitopot do kororosi.
Minoboros isio dilo ontok minoimagon di Pialaan Sipak Takraw Poinsompon Kinarut doid Lintuhun Pantai Lok Kawi, Kinarut di kawawagu diti.
Ka disio, miampai no o kotonudan komulakan doid ababayan sipoot miagal dilo, tantu no do kaanu yolo mongilag mantad katanud id ababayan di amu olidas kosuul no do dadah.
Ghulam i po nogi Puru Lintuhun Koundangan Pogun (Adun) Kawang minonongkounsikou po nogi di pangalapan di manganganjur om alansan isio ababayan miagal dilo kaanu do popogirot piombolutan om pogiobpinoiyan mogigiyon id watas dilo.
Pialaan dilo nakaanu raramit tosonong id hombo tinanud di soginumu 9 tinimungan mantad psosorili watas Kinarut om Papar.
Nokotindapou po nogi id ababayan dilo io Lalansanon Komogoton Rayat Kawang i Juil Nuatim om i tongo Puru Komitikuasa Manganganjur ngawi kaampai i tongo AJK Umno Bohogian.
|
