|
|
|
Shamsudin poindikau id tanga minumpazat do forum dino.
|
14th June, 2012
SANDAKAN: Layat mositi monongkotohuod tu pogun diti tomoimo otoonong om osuau piagahon vookon pogun di nongouga saasabap no do au nodii koimbuhai kotoonongon sundung tu ino kiguno montok kotihombusan tinau.
Puu Dewan Koundangan Pogun (Adun) uvang Sekong, Datuk Samsudin Yahya, minoboos sundung tu ingkaa layat au apatut asantaban ginavo miampai onu i naanu tu saviavi boogizan mositi kopiuman do ikoton kakal osodu om pogun vagu pointantu no do kotoguvang miampai ponginaman di hobi koponginam.
Nogi ka disido, kasaasavan mositi pointahangon miampai pongkimamaan kozo montok tuutulus miiso om misokodung kumaa humantoi angkab popoimbuhai iso pogun kobuu tumanud lahan sondii koikatan 2020.
“Id ikoton diti, polinta mazaa Koupisan Kointahangan mangazu abaabazan do baino diti nopo nga montok poposindab hizab kosingubasan id tinimnugan puu mogiigizon. Tuduvan dino montok popogiot hizab pihumaagan, guminavo pogun, kaanu monongkiahi om aadang,” ka disido.
Minamason pinopoimagon Forum Jatidiri 1Malaysia naazu miampai Koupisan Kointahangan Boogizan Sandakan id Dewan Suria Perdana, Wisma Kastam, id doiti, di koniab.
Ka disido abaabazan diti kiguno kozo saasabap no do ino kiningkokoton Gagasan 1Malaysia om Rukun Negara i manaak kolotian kokomoi di tangabaakas.
Tumanud disido, kosingumbasan sondii kilati do kointutunan sondii i kakal apantod miampai adat koubasanan, agama, tinau om pogun.
“Kaakun o layat mongkimamaa montok papataan kapamantangan om kinoonuan pomolintaan sondii mazaa popogiot om kopoimbuhazan pomumusoou miampai hizab guminavo pogun,” ka disido.
Ka disido, pogun diti mositi pataanon tu ino nopo nga pogun di mogisusuvai tinau om agama id nombo piunungan miampai pihumaagan di nokoonit nadadi ikoton kumaa vookon ginazo pogun kobuu di suvai.
“Sundung i do ingkaa, koozuzuvo pulitik pomogunan timpu baino diti nontodonon pogun nokotoguvang miampai mogisusuvai ponginaman om sangod i kopogundoonok sinuau om pihumaagan tinau.
“Sabaagi do pomitanan pongozuvan pokikitanan maapanau di kavavagu diti i kopokito kointutunan di agaga om osiou boogizan gugumaga i pinadahin mazaa tinimungan ngavi di sinuu.
Mantad dino ka disido, koozuzuvo diti mositi ihian kozo tu au koovit kovosian nga kalaatan hoohobi no kozo kumaa sinakagon mikot.
Ka disido, nung aiso hizab di tapantod id suang ginavo om toihaan mogiigizon hoohobi no kozo tanak tomuhok mantad dino au apatut kotoonongon om pihumaagan oundoonok do soosongian nopo.
|
