|
13th June, 2012
KOTA KINABALU: Kasaavan tampat pakalajaan montok maganu Tuhun Au Kadansaan (OKU) pakalaja id komponi dioho noindamaan noinsavat, ka di Montili Kotundaan Mogiigizon om Ahal Momoguno Datuk Azizah Mohd Dun.
Minoboos isido iti pointahang miampai kouangan ginumu pakalaja om kokusungan kalaja i tinaak id komponi ngavi dino montok tinimungan OKU.
Ka disido, tumanud pinotungaban mantad Koupisan Kotoinaan Kotundunan Am (JPKA), ginumu OKU id pogun diti i pakalaja om monoimo elaun pakalaja nokimai nopo nga 675 tuhun.
“Iti au kaampai pinotungaban mantad Koupisan Vinakas Kalaja om Perkeso i popoimagon abaabazan “return to work” (RTW). Ginumu kiis RTW mantad po Vuhan Koopod om Iso 2010 gisom Vuhan Kohimo 2012 ino nopo nga guminuhi pakalaja montok momogonop paganakan sondii om paganakan kahapas kohigaganan.
“Gisom diti ginumu OKU nokolijisto id Sabah nopo nga 18,931 tuhun. Sundung i do ingkaa ginumu dino tomoimo mivaavahiu tu kopolijistahan OKU id lahan (online) koponguhan do tuhun ginumuan popolijisto tanak toi ko puu paganakan OKU dioho,” ka disido.
Minoboos isido dino ontok pitimbungakan abal kahapas pinopoimagon do Abaabazan Tadau Balajalan OKU nazatan pogun Sabah 2012, id Dewan Wisma Wanita, id doiti, di koniab.
Minoboos i Azizah, polinta Barisan Nasional (BN) monoodo onu nopo i tavasi montok layat kaampai no OKU.
Vookon tuduvan abaabazan diti nopo nga montok popoinsavat kasaavan id tinimungan mogiigizon kokomoi balajalan OKU id suang pakalajaan om popoinsavat kasaavan miampai mongunsub kopolijistahan mogigium pakalajaan id suang tinimungan OKU.
Suvai mantad dino ka disido, ino nogi kiangkab popoinsavat kasaavan om tonggungan boogizan tampat pakalajaan montok manaak kosivatan kumaa OKU montok pakalaja, popointutun miampai mongunsub abaabazan balajalan OKU id pogun diti.
“Abaabazan diti kikahansanan kaanu popoinsavat pisokodungan miampai koisaan sukarela miampai tinan ngavi dino id suang pongkimamaan popoimbuhai mogisusuvai abaabazan pongunsuban Balajalan OKU,” ka disido.
Minoboos i Azizah, tampat pakalajaan i maganu tinimungan OKU pakalaja onuan do mogisusuvai panaak kaampai no au oontok do sukai.
|
