|
11th June, 2012
KOTA KINABALU: Poingkavason ningkokoton do Talun alun Lok Kawi-Sindumin Sipitang montok mongingkudi kobobohan talun alun om manaak kaandangan kumaa doid momoomoguno lahan nokomoi.
Minoboos i Montili Habus, Datuk Seri Anifah Haji Aman do songian o kopoingkavasan ningkokoton lahan diho do opongo tiinu, layat id pogun Sabah diti, hobi no do momoomoguno talun alun Lok Kawi-Sindumin Sipitang, kopomiumon kouhanan talun alun di hobi aandang.
Minoboos isido do opusou kozo o kopolintaan kumaa doid kopokionuan do layat om minggisom montok popotounda koumatan infrastruktur di tavasi kozo kumaa doid savi avi boogizan tuhun ginumuan id pogun Sabah diti.
“Nokopokianu zou om i Tan Sri Bernard Dompok kuminaa doid di Huguan Montili, Datuk Seri Najib Tun Razak mooi o lahan mantad Lok Kawi gisom id Sindumin.
“Minonuu i Huguan Montili doid di Montili Kalaja Tagazo mooi do monoihi om babaino diti, id proses iho monoodo katatadaai. Songian opongo do tiinu, kaanu tokou talun alun di gunoon kozo,” ka disido.
Noboos disido iti di ontok pinopohombus pason id Abaabazan Pogisosomoan Makan Sodop Miampai Nokopinsin Polinta, Mongingia om Pulis id uvang Parlimen Kimanis, id Le Meridian, do doiti di sodop tadau Koonom.
Anifah, isido ponogi i Puu Parlimen Kimanis, minoboos do sabaagi buuan di uvang nokomoi, minggisom isido montok manakadai om manaak di tavasi kozo montok kaandangan do layat.
“Okon ko tuhun zou nogi di poimatu om au zou kaanu dati manaan tonggungan diti nga miampai sokodung do savi avi layat.
“Sundung tu uvang Parlimen Kimanis nopo nga ahaab, poingkuo po nga hivangon ku timpu montok “mindau id gana” om sumuang id uvang ontok tikid doiti zou id Malaysia,” ka disido.
Ka disido, suvai ko papapanau tonggungan sabaagi hahansanon layat id uvang Parlimen Kimanis, atangkangau nogi isido miampai tonggungan montok pomogunan Malaysia diti.
“Mantad diho, kivaa do 105 upis ku id pototongkop vinoun. Minanaak zou ponuu kumaa doid upisol om duta ngaavi id habus pogun mooi do songian kivaa kaantakan, mositi no izioho monuubung dogo miampai potihombus,” ka disido.
Minoboos isido do layat id pomogunan diti nopo nga avasi kozo konasipan pibagahon miampai pomogunan ngaavi dahabus i notombuhui disido sohinaid diti.
“Nokougad zou no id 90 pomogunan id pototongkop vinoun om katama zou moboos do zotokou nopo nga tuhun di poinhohobi i soibau vinoun tu pomogunan dotokou nopo nga otoonong om ekonomi di noikot kozo vinasi nung pibagahon miampai pomogunan ngaavi suvai id vinoun.
“Miaga kozo id Amerikan, ekonomi dau nokoinsiibo, Europe miampai kokusutan kousinan, id Kohinsaon Tanga om Koubutan Afrika, ouga. Nga zotokou id Malaysia id siibo buuan di Huguan Montili om buuan di poguhui diho, mantad diho do opiumanan tokou o kemerdekaan,” ka disido.
Pinopobuzu nogi isido do sakadai sondii soginumu RM200,000 montok Tozibut Balajalan Kimanis om Kopolitif Komuhakan Kimanis.
“Koiho zou do balajalan nopo nga kiguno kozo, mantad diho do popotounda zou kousinan diho montok susumikul i momoguno kozo diho.
Montok tinimungan komuhakan di aanangan mongindapu… popotounda zou do RM100,000 montok Koperasi Belia Kimanis,” ka disido.
Suvai diho, minanaak nogi i Anifah do sakadai tososondii RM20,000 kuminaa doid potitikid koisaan nokopinsin pulis, mongingia om pakakalaja kopolintaan Parlimen Kimanis.
|
