|
4th June, 2012
SOGINUMU’ do 14 gaa kapaampai tongo artis Kadazan Dusun Murut (KDM) pinatanding ontok ababayan Anugerah Skrin KDM 2012 kopihondot do Tadau Kaamatan Pogun Sabah doid Lintuhun Hongkod Koisaan KDCA, di kawawagu diti.
Wokon nopo mantad dilo nga id bohogian kapaampai Gaa Susuminding Bontugan Murut, Kadazan om Dusun.
Naamot montok kategori lokunan nopo kapaampai Gaa Lokunan Koonduan om Kusai Bontugan, Palakun Monunumpoirak Bontugan om Telemovie Bontugan.
Naamot dilo, pinaharo nogi kopomoromitan Gaa Monunurat Momolihis KDM Bontugan, DJ KDM Bontugan, seniman KDM Poompus Timpu, MTV Karaoke KDM Bontugan, Sinding Rojak Bontugan Mantad Susuminding KDM, Sinding KDM Bontugan om Artis KDM Bontugan.
Sundung pia tu kopopongo nogi di kinosibukon tulan Kaamatan, koinsanai tongo pominat seni momolihis nokoiyonon amu pinopologos kosiwatan suminasi di ababayan i binuruan di momoboros i po nogi monunumpoirak nointutunan, Alex Raja Lawak.
Suai mantad kopomoromitan gaa, pipiro artis minampai nogi minamaramai gaa nokomoi miampai pinopokito kopokitonon diolo miagal dio Peter Dicky Lee om Ridah Malanjang.
|
