|
4th June, 2012
KUALA LUMPUR: Minonuu di koniab i Kumoduvo Huguan Montili, Tan Sri Muhyiddin Yassin doid puu tuhun ginumuan mooi do papatanom koimaan kikotonggungan doid manakadi tinimungan di momoguno om au songkuo vinasi konasipan.
Minoboos isido do koimaan diho mositi dodizon pongigitan om koubasanan mooi o Malaysia kotihombus kotindooi adadi pomogunan di otoonong, osindak om aandang miampai do layat diho i mogiigizon id kozuuzuvo osindak om tomoimo mogisasakadai.
“Sundung tu tokou do id iso pomogunan di nokobuu kozo om nakahantoi doid mogisuusuvai kaganaan nga nokoiho nogi tokou do id tatanga dotokou, kivaa nogi tinimungan ngaavi di mokianu sakadai om tohuod montok manampasi kiniopot toi ko manakadai monginggaan simbagat dioho,” ka disido.
Noboos disido iti di poguhui pinopoimagon abaabazan kotundunan Tan Sri Muhyiddin Charity Golf montok kimpin monohuod zaa, pomolisaan kohidasan, monohuod kavo suang tinan om sel tuontud, do doiti.
Muhyiddin, isido ponogi i minonimpuun do Tan Sri Muhyiddin Charity Golf, minoboos do koimaan miaga kikotonggungan sosial korporat (CSR) i nazu do kotinanan ngaavi korporat notimpuunan tumingkop id pomogunan diti om nakaanu sokodung mantad tatanga do tuhun ginumuan.
“Komozon diti do id Malaysia diti sundung tu id kozuzuvo tokou di kivavaa avasi, nga au au dotokou poingkudion o tonggungan dotokou kumaa doid puu id tuhun ginumuan i momoguno sakadai, sabap diho, pinggisoman miaga diti pindad-indad ku kozo.
“Hohobi po vagu do pinggisoman dotokou montok manakadai mooi o tozibut zaa pomogunan diti au kotoguvang krisis toi ko kobohingkaangan mantad ahal koonuan tohuod zaa i noihaan dotokou do sabaagi ahal kiguno i gunoon doid kogumuan koozuvo,” ka disido.
|
