|
|
|
Najib (tanga) nga suminazau nogi sazau ‘Ngajat’ miampai dazanak ngaavi di ontok panaandakan Tadau Gawai id Hamin Tanau George Chunggut, di koniab.
|
4th June, 2012
PAKAN: Kinahantazan do Malaysia doid popiiso do momogun nosizun tinau om ugama nopo nga noimagon do buuan vinoun, ka di Huguan Montili, Datuk Seri Najib Tun Razak.
Minoboos isido do kinahantazan popiiso do layat doid nunu noopo undovoon diho nopo nga koimazaan do buuan ngaavi vinoun, kaampai no buu mantad pomogunan nokobuu miaga do Pogun Molikan.
“Miho adadi o Malaysia do pomogunan model om poombitanan kumaa vinoun, iti okon ko Barisan Nasional (BN) o minoboos, osodu kozo o gugumaga… tuhun dahabus pinopoimagon do kihantazan dotokou, kinahantazan diho nopo nga katapatan di totopot,” ka disido di ontok pinopohombus pason id dumbangan kiikila 3,000 tuhun mogiigizon id Hamin Georgw anak Chunggut Nanga Nansang om posoihi do Pakan, do doiti di koniab.
Ka disido, duvo Senator mantad Pogun Molikan i minikot id Malaysia di kavavagu diti noimazaan miampai kinahantazan do kopolintaan BN do popotindooi kosindakon do layat id pomogunan Malaysia diti.
Minoboos i Najib do gagasan 1Malaysia di totopot diho nopo nga ahaid no kivaa id tatanga do tuhun ginumuan nosizun tinau id pomogunan diti om pointahang kozo iho doid koubasanan koposizon do layat Sarawak.
Tumanud disido, panaandakan do kalamazan ngaavi tuhun mogiigizon id pomogunan diti miaga do Gawai Dayak nopo nga popokito pogisusuvazan koubasanan i miho toimoon do savi avi layat id nonomboo noopo id Malaysia.
“Manaandak tokou do Gawai Dayak miampai kopiumanan monongkotohuod do pomogunan Malaysia nopo nga pinoimagon do iso pomogunan di nakahantoi, poguhui zou pinopoboos do gagasan 1Malaysia, Sarawak id totopot dino nopo nga nokopongigit nopo sunduvan 1Malaysia di sohinaid diti,” ka disido.
Ontok ponogi diho ka disido, mantad minongigit buuan kopomuu’anan pomogunan di tohu toun nakatahib, ogumu kinobuuon novit kuminaa Sarawak, kaampai no id uvang ngaavi sokid.
Ka disido, montok mongiho kozo do kotundaan diho aanu potihombuson, mositi o BN do onuan mahik mandate id pomihian tagazo do mikot tu pinggisoman popobuu pomogunan diti nopo nga momoguno pambalanjaan di tagazo om nogi okon ko maganu timpu di toduuk.
“Tumihombus o BN do manamong, mositi tokou do kaanu mandate vagu. Nung tohu toun ogumu minaan dotokou…uangan vagu himo toun po vagu ogumu vagu kosimbanon tagazo aantakan id pogun Sarawak,” ka disido.
Naamot diho, nagazat i Najib miampai hozou kinoizonon id kinuhuvan do “Berkikis Bulu Betis” minoboos do hozou diho mimang unik tu popokito iho pinggisoman do layat Sarawak montok mungkakod mimang buu sundung tu nunu noopo tundoonok di mositi toguvangon.
Ka disido, sabaagi popoimagon hozou kinoizonon diho, ahansan isido do hobi sinupu di Anderson Ngalai diho nopo nga miho poingkavason dumadi hozou nasional om hozoon ontok Tadau Merdeka om Tadau Malaysia do tiinu.
Potindapou nogi doid kalamazan diho i Vozoon Montili Tan Sri Abdul Taib Mahmud om i Polosidin Parti Demokratik Progresif Sarawak (SPDP) i ponogi Montili Kotundaan Sosial, Tan Sri William Mawan Ikom.
|
