|
1st June, 2012
PENAMPANG: Komontilin Kohidasan minonuu susu sakadai i tinaak kumaa sikul ngavi id uvang Kota Kinabalu potoodon naamot mantad no kiis navanit susu UHT pinopoompit do duvo sikul id pogun diti, di kavavagu.
Kumoduvo Montili Kohidasan Datuk Rosnah Abdul Rashid Shirlin minoboos ponuuan dino mositi do tonudon do saviavi sikul gisom koponoizukan di papanaon Boogizan Koumohigan om Kualiti Taakanon id siibo komontilian disido opupusan.
“Mokianu zou mooi pomogizan susu dino potoodon gisom kopoihaan poimbida pohobuson do Boogizan Koumohigan om Kualiti Taakanon. Saasabap no do baino diti timpu koundangan sikul, kokomoi pomogizan dino dati au koimbuhai,” ka disido.
Nasamaanan isido magaganu abal id lamai kopomoiganan Sipoot Koubasanan kopiondot do Lamai Kaamatan i pinoimagon di VozoonMontili Datuk Seri Musa Aman id sinasavat natadon Hongkod Koisaan id doiti di songkoniab.
Minoboos i Rosnah dino ontok pinokianu monugut kokomoi kiis navanit susu dino i pinopoompit do Sikul Jenis Kebangsaan Cina (SJKC) Lok Yuk om Sikul Kabangsaan (SK) St Francis Convent.
Ontok di ko 18 Vuhan Kohimo nakatahib, kiginumu do 88 tanak sikul SJKC Lok Yuk id Menggatal om vahu tanak sikul Sk St Francis Convent id Kota Kinabalu, nosogu nokotoguvang tanda oluahan tizan kahapas nokoinum susu coklat ontok timpu koundangan.
Minoboos i Rosnah ontok timpu diti, aiso nuununu kapanaakan susu pinapanau id pototongkop Sabah saasabap no do koundangan sikul i nokotimpuun di ko 28 Vuhan Kohimo nakatahib gisom 10 Vuhan Koonom diti.
Rosnah i nogi Puu Parlimen Papar mokianu pisokodungan mantad boogizan sikul mooi poposogu tosisikap kumaa Koupisan Kohidasan pogun nung kotoguvang kiis avanit di miaga montok monguhan haang sumusuut todoon.
“Ontok timpu diti, kiis avanit dino potindooi popoompit do duvo sikul id pogun diti. Aiso kopoihaan kavavagu gisom baino diti om boogizan dagai papahabus kointahangan poimbida songian kaanu kopoihaan mantad Boogizan Koumohigan Kualiti Taakanon,” ka disido.
Minoboos isido boogizan pomopian stok susu nokogompit nadadi boogizan kopoguhu manakadai kumaa kiis avanit taakanon dino.
“Boogizan pomopian nadadi boogizan kumaa avanit, mantad dino mokianu tokou papahabus om papatazad maganu pongintangan boogizan koumohigan hoohobi no kozo kokomoi pomopian di mositi do pounsubon tu ino momoguno koozuzuvo posoihi di kosudong,” ka disido.
|
