|
1st June, 2012
PENAMPANG: Koponoimaan lamai Kaamatan id Sabah minaan lamazo miampai koozuzuvo do poimponu sinindak om sinuau miampai pinopokito kopogisusuvazan koubasanan mogiigizon mamasok poinsandad id pogun diti i okomi sabaagi popokito do konsep 1Malaysia.
Kalamazan dino i naazu id sinasavat natadon Hongkod Koisaan id doiti tinoimo miampai pinopokito do koubasanan somok saviavi tinau i kivaa id pogun diti mazaa pogisusuvazan abaabazan toihaan om sazau koubasanan.
Iti kaampai no abaabazan kopomoiganan Sipoot Koubasanan kopiondot do lamai ontok toun diti kitema “Cinta Terhadap Kebudayaan Melahirkan Masyarakat Penyayang” i pinoimagon di Vozoon Montili Sabah Datuk Seri Musa Aman.
Ontok minamason pinopoimagon lamai dino, Musa i nogi Montili Kousinan pogun minoboos do pointounda isido montok momouang sakadai montok papahantoi abaabazan Lamai Kaamatan toun tiiso.
“Kogompitan saviavi boogizan id suang papahantoi abaabazan diti atahang kopokito do hizab pihumaagan, sinuau om piunungan id suang tinimungan layat id pogun diti pointantu no do kopongunsikou kozo,” ka disido.
Sundung i do ingkaa, poposoou i Musa layat Sabah mooi momogompi kotoonongon di naanu babaino diti mantad no koozuzuvo otoonong om aadang okon ko iso di koimbuhai id lahan poinsandad.
“Id sambahik dino, ino mositi no do pogioton, gompizon om pohuubon mooi tomoimo apantod om au kanu montok kosoon do tinimungan di aiso tonggungan,” ka disido.
Kokomoi pongkimamaan pongozuvan sipoot koubasanan, ka disido, abaabazan i popogompit saviavi layat dino okon nopo kaanu popointanga toihaan kavavagu, nogi ino mongintong sipoot koubasanan tuutulus ogompi om otungkus sinakagon mikot.
Abaabazan kagazat lamai dino nopo nga Unduk Ngadau Kaamatan i pamagazat kopoguhu koponoimaan Lamai Kaamatan potitikid toun.
Nokotindapou nogi Kumoduvo Vozoon Montili nogi Ponikoon Komiti kikuasa Mangazu Lamai Kaamatan Nazatan Pogun 2012 Tan Sri Joseph Pairin Kitingan.
Lamai dino pinoimagon miampai minonuntung do tagung di Musa.
|
