|
1st June, 2012
KOTA KINABALU: Polinta Pogun Sabah au avagatan montok papasaga upalai sakadai kouangan montok kovosian layat, hoohobi no kozo id suang pongkimamaan popoinsavat pihumaagan mogiigizon mogisusuvai tinau om agama, ka di Vozoon Montili Datuk Seri Musa Aman di koniab.
Ka disido kapanaakan sakadai kousinan pinouang nokotunud kozo miampai koozuzuvo om kopokionuan babaino, hoohobi no kozo ontok kousinan pogun noindamaan nakapantod.
“Miampai kivaa pihumaagan layat (layat), tokou saviavi kaanu papantod kousinan dotokou. Kaanu nogi tokou popokito tangangazan dotokou monoina kousinan dotokou miampai abaa,” ka disido id lamai ponutuban Kaamatan nazatan pogun id doiti di Yang Dipertua Negeri Tun Juhar Mahiruddin.
Minoboos isido pihumaagan layat nopo nga boogizan kiguno id suang mamagazat hobi ginumu tutumombuhui om papaapu kumaa Sabah.
Ka disido pihumaagan di tapantod kapanaak kahansanan kumaa mogiigizon dahabus kumaa kotoonongon om koumohigan pogun diti.
“Tokou mositi momogompi koubasanan diti mooi kaanu tokou papabaa ikonomi dotokou id lahan misokodung.
“Pointantu no do kivaa kovosian id sambahik adat koubasanan komohoingan dotkou id suang popoimbuhai topiuman doun dotokou id tinimungan dotokou,” ka disido.
Suvai mantad dino, minokianu nogi i Musa hahansanon ngavi layat om puu polinta mooi do tuutulus pakalaja miampai do otuhid montok layat.
“Iti no koubasanan Barisan Nasional. Tokou mositi tomoimo mindau padang om misokodung montok layat,” ka disido.
|
