|
27th May, 2012
TAMBUNAN: Kopiumanan om pisokodungan mantad savi avi boogizan nopo nga kiguno kozo doid koponguhanan kobohingkaangan kahasaan tavagat id kinoizonon tososondii.
Minoboos i Kumoduvo Vozoon Montili, i ponogi Montili Kotundaan Infrastruktur, Tan Sri Joseph Pairin Kitingan do duuduvo ahal diho do mositi ihoon kozo do savi avi boogizan doid kopongipopan kahasaan tavagat om nogi mongingkudi gontob kahasaan tavagat pomogunan diti miampai songovian diho.
Pairin, isido ponogi i Puu Hintuun Koundangan Pogun (Adun) Tambunan om Puu Parlimen Keningau, minoboos do mogiigizon posoihi mimang do ahaid no madadi mato om tohingo kumaa boogizan pulis doid ponguhanan tapanazan kahasaan tavagat.
“Mantad diho, tuhun mogiigizon hobi no id uvang habus kakadazan do mositi monoguvang kalaja manakadai boogizan pulis doid ponguhanan kobohingkaangan tapanazan kahasaan tavagat,” ka disido di ontok minonutuzan id abaabazan Panakadazan Kaganapan Logistik om Dialog id natadon do Balai Pulis Tambunan, di ontok minsosodop tadau Kaapat nakatahib.
Id abaabazan diho, pinapataak nogi i Pairin do kaganapan logistic miaga do tikoon, kiim, kikizapan om susuvai po kuminaa do balai pulis Tambunan, i tinoimo di Huguan Pulis Uvang Tambunan, SM Murad Mohd Yatim.
Naamot diho, pinopoosoou i Huguan Pulis Uvang Keningau, DSP Zahari Mohamed doid tuhun ginumuan mooi do monuubung boogizan pulis sokio nung kivaa tuhun di au notutudan minsoihi id natadon hamin toi kampung dioho.
Ka disido, miampai kivaa pionitan tasikap mantad tuhun ginumuan, papavasa do ahal di au pobpiumanan aanu oivad.
Tumanud disido, piatusan indeks kahasaan tavagat vinagkang montok vuhan Koiso gisom vuhan Kohimo toun diti nopo nga nokoinsiibo 97 piatus om iho nopo nga asil mantad sokodung do tuhun ginumuan kuminaa boogizan pulis doid ponguhanan kahasaan tavagat.
Ka disido, pionitan do tuhun ginumuan posoihi miampai boogizan pulis nopo nga kiguno kozo doid panakadazan montok mongingkudi gontob kahasaan tavagat di tumongkop kozo.
Mantad diho, ahansan isido kumaa doid tuhun ginumuan, hobi no do buuan posoihi mooi do tomoimo monuubung miampai boogizan pulis montok manamong kotoonongan songovian id pomogunan dotokou, hobi no id uvang habus kakadazan, ka disido.
|
