|
23rd February, 2012
BELURAN: Mositi onuan pongumbanganan o ahal om kobohingkaangan tana id pogun Sabah om mositi uhanon do kopolintaan miampai poinsompuu.
Minoboos i Puu Parlimen Beluran, Datuk Ronald Kiandee do ahal diho nopo nga au miho pohogoson binuzu dino do nadadi ahal pulitik gugumaga ontok potitikid izioho sumoomo do mogiigizon, hobi no id uvang habus kakadazan.
Tumanud disido, au miho do pohogoson o boogizan gugumaga do momoguno ahal diho montok agenda pulitik dioho montok maganu sokodung do layat.
“Mantad diho, mositi timbangon om maganu ponginsomokan popoimbuhai tribunal toi monuidong komiti poimbida id nazatan kabinet sabaagi haang monguhan kobohingkaangan diho miampai hobi kivaza.
Minoboos di ontok Abaabazan Miampai LAyat id Kampung Rumidi, somok doiti di koniab, minoboos i Ronald do okon ko savi avi kobohingkaangan tana nontodonon komungakangan do Koupisan Tana om Monuku tu vookon kobohingkaangan nga mantad nogi do sanganu om huguan mongungupalai.
Tumanud disido, 23,000 upalai do nakadada id uvang diti di mositi uhanon do koupisan nokomoi.
Ronald, isido ponogi i Kumoduvo Momumuntu Hintuun Layat, minoboos do maza potitikid pituubungan miampai layat, ahal kogompit tana nopo nga sabaagi ahal koiso di poungkabangon do mogiigizon.
Ka disido, ahal diho mositi uhanon tosisikap montok popokito pinusou do kopolintaan doid panakadazan monguhan kobohingkaangan di kogumuan dino notoguvang do layat id habus kakadazan id pogun Sabah diti.
Otumbazaan isido do kopolintaan maza undang-undang di kivaa koimau monguhan kobohingkaangan upalai tana di mihapau om maan proses miampai nopihi do Koupisan Tana id nazatan uvang.
Ontok abaabazan diho, pinapataak nogi i Ronald do sakadai soginumu RM40,000 kumina doid 80 mogiigizon mantad Kampung Rumidi, Kampung Nangoh, Kampung Sinaputan om Kampung Tarasak.
Pinoboos nogi disido o kopoobian soginumu RM100,000 montok poboogizon kumaa 10 kokampungan id suang Zon Nangoh montok papaanjul projik kotundaan.
|
