|
9th September, 2010
TUARAN: Koyuon ralan id Kampung Dugang, doros hiti i amu’ notiir nosili kobolingkahangan di tongo’ mogigiyon sabab olingkobungan do waig soira’ nopo do rumasam om maganu timpu pipiro tadau do tumuu.
Kobolingkahangan dilo’ pinointalang di songulun mogigiyon i Md. Salleh Dahlan, 38, i pinopoilo do ralan nokomoi kopogowit kobolingkahangan lolobi no kumaa di tongo’ susumikul i asansagan do mimburutak do mongoi sikul.
Ka disio, asansagan o susumikul do mintana’ sabab aiso’ padsakaian i sumuang do kampung dilo’.
Koyuon di miagal, ka disio nokoponinong po nogi’ do kobolingkahangan kumaa mogigiyon aiso’ padsakaian sabab padsakaian ginumuan amu’ kasaga’ do sumuang kampung nosusuhut di ralan do oburutak.
Pikikiro do Md. Salleh do lobi 100 mogigiyon i tumalahan poinponu’ do ralan nokomoi sabaagi kagaganapan.
Pinointalang disio do pipiro koiyonon ralan nokomoi notiis pointonod pipiro toun di nakatalib nga’ ralan kisinodu’ do kikiro 1 kilometer tinoliban do moniir.
Ka disio kawagu, kogumuan do mogigiyon kampung dilo’ momumutanom om osusa’ mogowit do asil tanom diolo’ kumaa kakadayan do ngoyon padagango’ sabab aiso’ padsakaian di sumuang doid watas pinomutanaman diolo’.
“Asansagan mogigiyon mamabo’ di asil pomutanaman diolo’, om haro nogi’ wokon di kologos soira’ amu’ osiwatan do mogowit kumaa id kakadayan,” ka disio pinoposuku’ kobolingkahangan dilo’ kuminaa New Sabah Times, di kaawagu.
Minoboros isio do koyuon di miagal potoguang po nogi’ do mogigiyon soira’ do magadau sabab ralan dilo’ kisoliohuk om mogiluluang bagas notimungan do waig.
Pinointalang disio do kobolingkahangan dilo’ impipiro do potoguango’ di lalansanon kampung kumaa bohogian poinggompit nga’ gisom baino’ aiso’ po laang di naanu.
Kohondot dilo’, isio i minongobi’ do mogigiyon kampung nokomoi pinapabanta’ kobolingkahangan diti maya’ karatas habar miampai kalansanan koimbayat kopomodulian mantad bohogian kikuasa’ lolobi no mongongobi’ rayat.
|
