|
9th September, 2010
BEAUFORT: Onu nodii o douso tanak diti? Dinuanan do mohoing tondu miampai aiso do kosianan hoohobi po vagu tadau suvab koikatan do lamai hari raya montok saviavi i apatut ongounsikou nga id sambahik dino katangaban notoguvang do tanak diti mindad kouhian do mohoing tondu disido.
Ingkaa no nasip i notoguvang di Evyana Irzanny Bte Mohd Nazri, 3, i babaino au ohidas ahasu mantad po mohoing tondu disido Rusinah Bte Ibrahim minomoduan disido mantad po tohu minggu nakatahib om baino au nokoiho id nombo.
Evyana baino tamangan do mohoing kusai disido (savo di Rusinah) Mohd Nazri Bin Apal, 28, id Kampung Pitas, Beaufort.
“Aiso pinioduan dagai miampai di savo ku nga kivaa pason toniibo (SMS) i notoimo ku pinopoiho do abazatan dagai om izou sondii au nokoiho onu saasabap disido do minomoduan hamin,” ka di Mohd Nazri.
Ka disido, nokimanan nogi disido minonolifaun di savo disido nga au suminimba tolifaun nga id sambahik dino nokotoimo husi SMS do au nodii isido muhi id daamin nga nung muhi nga id hinominon paganakan disido id Kg. Pintas.
“Miguuguhi zou no mokinsian mooi osianan kumaa tanak dagai i babaino au ohidas om saasau mogium do mohoing disido nga aiso nuununu samba mantad disido,” ka di Mohd Nazri.
Mohd Nazri i pakalaja id iso komponi Pembekal tuutulus dino humansan mooi savo disido gumuhi id paganakan montok timpu dumonto do tanak dioho Evyana.
|
