|
2nd September, 2010
NABAWAN: Kinomordikaan i nosigampot mantad no do pisompuruan om piuludan di mogigiyon orurukut tinaru om kotumbayaan di winonsoi do tongo’ lalansanon nongkopogulu, kiguno do gompion.
I Luguan Umno Bohogian Nabawan i Datuk Abdul Ghani Yassin, minoboros kopogisusuaian tinaru om ugama’ okon ko’ pangantob do mogigiyon pogun diti do momogompi’ piuludan id pogun di nokomordika diti.
Ka disio, koyuon di oulud doid pogun diti aanu monilombus nung gompion no do rayat o koyuon tosonong doid koposion om piromutan.
Isio i po nogi’ Kumoduo Ponorikohon Kotinanan Komogoton Tana’ Pogun Sabah (LKTNS), minoboros dilo’ ontok pinopoimagon ramai Tadau Kinomordikaan SIB Watas Nabawan doid Kampung Enam, doros hiti.
Nokotindapou po nogi’ i Luguan Watas SIB Nabawan i Daud Anggau om i Kumoduo Luguan Umno Bohogian Pensiangan i Ahuar Rasam.
Potilombus dino, ka di Ghani, sunduan 1Malaysia do sotopot nopo nga’ nokogirot no doid rayat pogun Sabah lolobi id watas poonsokid i ogumu’ tinaru om mogisusuai kotumbayaan ugama’.
Nokopogulu i Daud, doid boboroson disio minoboros do Tadau Kinomordikaan montok SIB Watas diti nopo nga’ ababayan potitikid toun montok po nogi’ do momohondom kinolubukan di tongo’ pinopoburu’ kinomordikaan.
“Iti po nogi’ nga’ kopongimbulaian sunduan mupus pogun kosuul no doid nayatan tongo’ komulakan SIB id watas diti.
Ramai Tadau Kinomordikaan dilo’ do toun diti piniamung di ababayan Juara Rakyat montok wulan Kawalu’ ilo’ nopo nga’ kitulu do “Ibadah dan Kerohanian”.
Id ramai dilo’, pinapahabar i Ghani do toluod sondiri’ 100 karung simin montok pomongo di lintuhun SIB Kampung Enam.
|
